नेपाल टेलिकमको विन्टर अफर, आकर्षक भ्वाइस र डाटा प्याकेज उपलब्ध

काठमाडौँ – नेपाल टेलिकमले आफ्ना सेवाग्राहीको सुविधालाई ध्यानमा राख्दै विभिन्न प्याकेजसहितको आकर्षक विन्टर अफर २०८२ सार्वजनिक गरेको छ। यसअघि सञ्चालनमा रहेको अटम अफरअन्तर्गतका प्याकेजहरू सेवाग्राहीले अत्यधिक रुचाएको पाइएकाले तिनै प्याकेजलाई निरन्तरता दिँदै नयाँ अफर ल्याइएको कम्पनीले जनाएको छ।

विन्टर अफरअन्तर्गत एनटी–एनटी भ्वाइस प्याक, अल नेट भ्वाइस प्याक, अनलिमिटेड भ्वाइस प्याक, विभिन्न प्रकारका डाटा प्याक, अनलिमिटेड प्याकेज, कम्बो प्याक, सजिलो अनलिमिटेड प्याक, इयर्ली अनलिमिटेड प्याक, रेन्टलसहितका पोस्टपेड प्याकेज तथा सामाजिक सञ्जाल प्याकेजहरू यथावत रूपमा उपलब्ध रहनेछन्।

त्यसैगरी एड–अन प्याक, सीयूजी प्याकेज, फरक क्षमता भएका व्यक्तिहरूका लागि विशेष प्याकेज, नमस्ते वाइफाइ प्रयोगकर्ताका लागि बन्डल प्याकेज तथा एफटीटीएच अन्तर्गतका प्याकेजहरू पनि निरन्तर रूपमा सञ्चालनमा रहने नेपाल टेलिकमले जनाएको छ।

पोस्टपेड मोबाइल सेवाअन्तर्गत उपलब्ध सजिलो अनलिमिटेड प्याकेजलाई अब स्वतः नवीकरण हुने रिकरिङ प्याकेजका रूपमा निरन्तरता दिइएको छ। यससँगै प्रयोगकर्ताले प्रत्येक महिना छुट्टै नवीकरण गर्नुपर्ने झन्झटबाट मुक्ति पाउनेछन्। यस प्याकेजलाई अब *1415# डायल गरेर मात्र नभई नेपाल टेलिकम एप तथा कम्पनीको वेबसाइटमार्फत पनि लिन सकिने व्यवस्था गरिएको छ।

विन्टर अफर २०८२ अन्तर्गतका सबै प्याकेजहरू मिति २०८२ माघ ११ गतेदेखि लागू भई आगामी ९० दिनसम्म उपलब्ध रहनेछन्। सेवाग्राहीले *1415# डायल गरी वा नेपाल टेलिकम एप तथा कम्पनीको आधिकारिक वेबसाइटमार्फत विस्तृत जानकारी लिन तथा सेवा खरिद गर्न सक्नेछन्।

ग्राहकवर्गको आवश्यकतालाई केन्द्रमा राखेर ल्याइएको विन्टर अफर सेवाग्राहीका लागि उपयोगी र आकर्षक हुने विश्वास कम्पनीले व्यक्त गरेको छ।