काठमाडौं शैक्षिक मेला सम्पन्न, प्रयोगात्मक सिकाइमा विद्यार्थीको आकर्षक प्रस्तुति

काठमाडौं । दुई दिने ‘काठमाडौं शैक्षिक मेला’ फागुन १७ गते सम्पन्न भएको छ। राष्ट्रिय सभा गृहमा आयोजित मेलामा विद्यार्थीहरूले विभिन्न प्रदर्शनी र प्रस्तुति मार्फत आफ्नो सीप तथा सिकाइ देखाएका थिए।

मेलाका क्रममा विद्यार्थीहरूले नेपाली, नेपाल भाषा र अंग्रेजी गरी तीन भाषामा नृत्य, अभिनय, संकेत तथा संवाद मार्फत आफ्नो सिप प्रदर्शन गरेका थिए। उनीहरूले कपडामा आइरन लगाउने, टाँक लगाउने, घरायसी कार्यहरू जस्तै खाना तथा चिया-कफी बनाउने, सरसफाइ जस्ता सीपहरूको प्रभाव दैनिक जीवनमा कसरी पर्छ भन्ने कुरालाई अभिव्यक्त गरेका थिए। साथै, कुमारी नृत्य, परम्परागत धिमे बाजा, मजिपा लाखे तथा पुलुकिसी झाँकी प्रस्तुत गरिएको थियो।

प्रदर्शनी तथा गतिविधिहरूमा विज्ञान, प्रविधि, इञ्जिनियरिङ, कला र गणित (STEM), भित्तेचित्र, संस्कृति तथा सम्पदा, ट्राफिक व्यवस्थापन, विपद् व्यवस्थापन, एनिमेसन तथा गेमिफिकेशन, नाट्यकला, व्यक्तित्व विकास, उद्यमशील सोच, पठन संस्कार, योग, संगीत तथा नृत्य, ड्रोन प्रविधि र कोडिङ जस्ता विधाहरू समेटिएका थिए।

मेलामा विद्यालयहरूमा उपलब्ध हुने दिवा खाजाको समेत प्रदर्शनी गरिएको थियो। ३० रुपैयाँमा उपलब्ध खाजाको जानकारी दिन विद्यालयकै भान्साबाट खाना वितरण गरिएको थियो। दुई दिनमा करिब २ लाख ५० हजार रुपैयाँ बराबरको खाजा विक्री भएको शिक्षा विभागले जनाएको छ।

मेलाको समापन समारोहमा शिक्षा, स्वास्थ्य समितिका संयोजक चिनीकाजी महर्जनले विद्यार्थीहरूको प्रस्तुतिको प्रशंसा गर्दै विद्यालय उमेरमै प्राप्त हुने नेतृत्व विकासको महत्त्वलाई जोड दिए। उनले नमूना संसद कार्यक्रमको विषयमा बोल्दै असल राजनीतिले मात्र समग्र विकास सम्भव हुने धारणा व्यक्त गरे।

नमूना संसद कार्यक्रममा एलआरआई विद्यालयका कक्षा ९ र १० का विद्यार्थीहरूले संसदीय अभ्यास प्रस्तुत गरेका थिए। उक्त अभ्यासमा शैक्षिक प्रणाली, शान्ति सुरक्षा, रोजगारी, सुशासन, भ्रष्टाचार नियन्त्रण, कृषि, ऊर्जा तथा जलस्रोत व्यवस्थापनजस्ता विषय समेटिएको थियो। विद्यार्थीहरूले सभामुख, उपसभामुख, सत्तापक्ष तथा प्रतिपक्षको भूमिका निर्वाह गर्दै जिम्मेवार राजनीतिक व्यवहार प्रस्तुत गरेका थिए।

शहरी योजना आयोगका सदस्य इञ्जिनियर शैलेन्द्र झाले बुक फ्री फ्राइडे कार्यक्रमको प्रभावकारिता उजागर गर्दै सिकाइको व्यवहारिक पक्षलाई थप मजबुत बनाउने दिशामा कार्यक्रम केन्द्रित गरिने बताए। सहायक विज्ञ सस्मित पोखरेलले व्यवहारिक सिकाइका माध्यमबाट विद्यार्थीहरूको बहुआयामिक विकास भइरहेको तथ्य मेलाका गतिविधिहरूबाट पुष्टि भएको बताए।

महानगरपालिकाका शिक्षा अधिकृत ओमप्रसाद गौतमका अनुसार मेला तीन चरणमा सञ्चालन हुनेछ। पहिलो चरणको कार्यक्रम सम्पन्न भइसकेको छ भने दोस्रो चरणमा फागुन २३ गते शिक्षा साझेदार, सरोकारवालाहरू तथा इच्छुक व्यक्तिहरूलाई नजिकका सामुदायिक विद्यालयहरू अवलोकन गराइनेछ। तेस्रो चरणमा शैक्षिक क्रियाकलापका नवीनतम आयामबारे गोलमेच अन्तरक्रिया गरिनेछ।

महानगरपालिकाभित्र ८७ सामुदायिक विद्यालयमा ६१ हजार ३२० तथा ५२४ संस्थागत विद्यालयमा २ लाख १० हजार ९३४ विद्यार्थी अध्ययनरत छन्। विद्यालय शिक्षाको गुणस्तर अभिवृद्धि तथा स्तरोन्नतिका लागि महानगरपालिकाले अनुसन्धानमा आधारित लगानी वृद्धि गरिरहेको छ। यस अन्तर्गत, ‘गरी खाने शिक्षा, महानगरपालिकाको इच्छा’ कार्यक्रम कार्यान्वयनमा ल्याइएको छ भने ‘सुन्दर विद्यालय परियोजना’ र ‘रचनात्मक विद्यालय’ पनि सञ्चालन गरिएका छन्।

महानगरपालिकाले सञ्चालन गरिरहेका यी कार्यक्रमहरूले शैक्षिक प्रणालीलाई व्यवहारिक तथा समयसापेक्ष बनाई दक्ष नागरिक उत्पादन गर्न सहयोग पुग्ने विश्वास गरिएको छ।