सुशासन तथा पारदर्शिता अभिवृद्धिका लागि आईएमई लाइफको विशेष तालिम कार्यक्रम

काठमाडौँ — आईएमई लाइफ इन्स्योरेन्स कम्पनी लिमिटेडले सम्पत्ति शुद्धीकरण  तथा आतंककारी गतिविधिमा हुने वित्तीय लगानी रोकथामसम्बन्धी कानुनी तथा कार्यान्वयन पक्षबारे संस्थागत क्षमता अभिवृद्धि गर्ने उद्देश्यले विशेष तालिम सम्पन्न गरेको छ। कम्पनीका सञ्चालक समिति अध्यक्ष, समिति सदस्य, प्रबन्धक तथा विभागीय प्रमुखहरूलाई लक्षित गरी आयोजित तालिममा जोखिम व्यवस्थापनदेखि कानुनी दायित्वसम्मका विषय समेटिएका थिए।

तालिममा विद्यमान ‘सम्पत्ति शुद्धीकरण निवारण ऐन’, ‘आतंकवादी तथा विनाशकारी हातहतियार निर्माण वा विस्तारमा हुने वित्तीय लगानी निवारण ऐन’ तथा नियमनकारी निकाय—नेपाल बीमा प्राधिकरण, फिनट्र्याक र अन्य वित्तीय नियमन संस्थाबाट जारी भएका निर्देशनमा रहेका प्रमुख कानुनी प्रावधानहरूको विस्तृत जानकारी प्रदान गरिएको कम्पनीले जनाएको छ। नयाँ संशोधन तथा हालै लागू गरिएका दफा–उपदफाबारे पनि सहभागीहरूलाई अवगत गराइएको थियो।

कार्यक्रममा सञ्चालक समिति अध्यक्ष डा. रामहरि अर्यालले सम्पत्ति शुद्धीकरण निवारण केवल कानुनी दायित्व मात्र नभई, संस्थागत सुशासन, पारदर्शिता र दिगोपनाका लागि अनिवार्य आधार रहेको उल्लेख गर्दै व्यवस्थापन, विभागीय प्रमुख तथा सम्पूर्ण कर्मचारीको साझा भूमिकाले मात्र प्रभावकारी कार्यान्वयन सम्भव हुने बताए। उनले जोखिम आधारित दृष्टिकोण  लागू गर्दै आन्तरिक नियन्त्रण प्रणाली सुदृढ गर्न आवश्यक रहेको धारणा राखे।

त्यस्तै, कम्पनीका प्रमुख कार्यकारी अधिकृत पवनकुमार खड्काले सम्पत्ति शुद्धीकरण तथा आतंककारी वित्तीयकरण निवारणसम्बन्धी कानुनको कडाईका साथ पालना गर्नु बीमा क्षेत्रको विश्वसनीयता, ग्राहकको सुरक्षाभावना र लगानीकर्ताको विश्वास अभिवृद्धि गर्ने महत्वपूर्ण तत्व भएको बताए। उनका अनुसार, अन्तर्राष्ट्रिय स्तरका अनुपालन मापदण्ड पालनाले कम्पनीलाई प्रतिस्पर्धी र उत्तरदायी संस्थाको रूपमा स्थापित गर्न मद्दत गर्नेछ।

आईएमई लाइफले आगामी दिनमा पनि कर्मचारीहरूलाई निरन्तर क्षमता विकास तालिममार्फत नियामक अनुपालन  र सुशासन अभिवृद्धि गर्ने योजना अघि सारेको जनाएको छ।