‘उद्योगलाई प्रोत्साहन दिने प्रदर्शनी केन्द्र निर्माणमा सरकार प्रतिबद्ध’ — अर्थमन्त्री पौडेल

काठमाडौं । उपप्रधानमन्त्री तथा अर्थमन्त्री विष्णुप्रसाद पौडेलले भृकुटीमण्डपमा अन्तर्राष्ट्रिय स्तरको प्रदर्शनी केन्द्र निर्माण गर्न सरकार प्रतिवद्ध रहेको बताएका छन्। आगामी दुई वर्षभित्र निर्माण कार्य सम्पन्न हुने विश्वास व्यक्त गर्दै उनले उक्त केन्द्रले नेपाली उद्योग तथा व्यवसाय प्रवर्द्धनमा महत्वपूर्ण योगदान पुर्‍याउने बताए।

नेपाल अटोमोबाइल इम्पोर्टर्स एन्ड म्यानुफ्याक्चर्स एशोसिएसन (नाइमा) द्वारा आयोजित ‘नाइमा नेपाल मोबिलिटी एक्स्पो २०२५’ को उद्घाटन समारोहलाई सम्बोधन गर्दै अर्थमन्त्री पौडेलले भने, “बजेटमार्फत हामीले कार्यान्वयन सम्भव नहुने योजना समावेश गरेका छैनौं। एक वर्षमै सकिन नसक्ला, तर दुई वर्षभित्र अन्तर्राष्ट्रिय मापदण्डअनुसारको प्रदर्शनी केन्द्र भृकुटीमण्डपमा निर्माण हुनेछ।”

उनका अनुसार प्रदर्शनी स्थलको व्यवस्थापन र त्यहाँ आयोजना हुने कार्यक्रमप्रति सरकारको चासो र सहभागिता रहनेछ। उद्योग तथा व्यवसाय प्रवर्द्धनका लागि यस्तो संरचना अपरिहार्य भएको उल्लेख गर्दै उनले सरकार पूर्वाधार विकासमार्फत दिगो आर्थिक वृद्धिको दिशामा अघि बढिरहेको स्पष्ट पारे।

साथै उनले भौतिक पूर्वाधार निर्माण, विशेषतः सडक सञ्जाल विस्तार र स्तरोन्नतिलाई सरकारले प्राथमिकतामा राखेको जानकारी दिँदै निजी क्षेत्रसँग सहकार्य गर्दै अघि बढ्न सरकार तयार रहेको धारणा राखे।