१० दिनभित्र सेना र प्रहरीलाई बहाल कर बुझाउन महानगरको पत्र

काठमाडौँ, २३ भाद्र । काठमाडौँ महानगरपालिकाले नेपाली सेना र नेपाल प्रहरीलाई १० दिनभित्र बहाल कर बुझाउन अल्टिमेटम दिएकोछ ।
महानगरको राजस्व विभागले नेपाली सेना, नेपाल प्रहरी र समाज कल्याण परिषद्लाई बहाल कर बुझाउन भन्दै पत्र काटेको हो ।

आफ्नो क्षेत्रभित्र बहालमा लगाई बहाल आम्दानी गरेको देखिएकाले वडा कार्यालयमा बहाल कर बुझाउन पटक पटक ताकेता गरे पनि नबुझाएको भन्दै १० दिनको अल्टिमेटम दिएको हो ।

बहाल आम्दानीको विवरणसहित पत्र प्राप्त भएको १० दिनभित्र सम्बन्धित वडा कार्यालयमा गएर नियमानुसार बहाल कर र जरिवाना बुझाउन महानगरले पत्रमा उल्लेख गरेको छ ।

तोकिएको मितिभित्र बहाल कर नबुझाए महानगरापलिकाको राजस्व ऐन, २०७५ बमोजिम कारबाही गरी बाँकी कर असूलउपर गर्न आवश्यक प्रक्रिया अघि बढाइने पत्रमा उल्लेख गरिएको छ ।