साल्ट ट्रेडिङले बिक्री गर्‍यो ८५ हजारभन्दा बढी बोरा रासायनिक मल

काठमाडौँ । चितवनमा रहेको साल्ट ट्रेडिङ कर्पोरेसन शाखा कार्यालयले चालु आर्थिक वर्ष २०८२/८३ मा हालसम्म किसानलाई पर्याप्त मात्रामा रासायनिक मल बिक्री गरेको जनाएको छ। कार्यालयका अनुसार अहिलेसम्म ३५ हजार ८३८ बोरा युरिया, ४४ हजार ९४४ बोरा डीएपी र चार हजार ९४३ बोरा पोटास बिक्री भइसकेको छ। हाल नौ हजार २०० बोरा युरिया र एक हजार बोरा डीएपी बिक्री भइरहेको छ भने थप बिक्रीका लागि सात हजार ८०२ बोरा युरिया, दुई हजार ८६६ बोरा डीएपी र १२ हजार ४२५ बोरा पोटास मौज्दात रहेको छ। अहिले ५० केजी युरियाको मूल्य ८४७ रुपैयाँ, डीएपीको दुई हजार २९७ रुपैयाँ र पोटासको एक हजार ६९७ रुपैयाँ तोकिएको छ।

शाखा प्रमुख बुद्धि विनोद दाहालका अनुसार सरकारले तोकेको अनुदानित मूल्यमा जिल्लाका सूचीकृत बिक्रेतामार्फत मल बिक्री भइरहेको छ। किसानलाई खेतीको मुख्य समयमा मल अभाव हुन नदिन स्थानीय तहको सिफारिसका आधारमा समयमै आपूर्ति गर्ने व्यवस्था मिलाइएको उहाँले बताउनुभयो। किसानले कति मल खरिद गरे भन्ने विवरण पारदर्शी बनाउन सबै बिक्रेताले ‘फार्मर म्यानेजमेन्ट सिस्टम’ सफ्टवेयरमा विवरण राख्ने व्यवस्था लागू गरिँदैछ। यसका लागि बिक्रेतालाई तालिमसमेत दिइएको छ। यस वर्ष रोपाइँका बेला डीएपीको माग बढे पनि अहिले मलको आपूर्ति सामान्य अवस्थामा रहेको कार्यालयले जनाएको छ।