भेनेजुएलामा शक्तिशाली भूकम्प,व्यापक क्षतिको आशंका

एजेन्सी । भेनेजुएलामा बुधबार साँझ शक्तिशाली भूकम्प गएपछि ठूलो क्षति भएको छ। स्थानीय समयअनुसार साँझ ६ बजेतिर ७.२ र ७.५ म्याग्निच्युडका दुई भूकम्प एक मिनेटको अन्तरमै आएका थिए। भूकम्पको केन्द्र उत्तरी भेनेजुएलामा रहेको बताइएको छ।

भूकम्पका कारण राजधानी काराकाससहित विभिन्न स्थानमा भवनहरू भत्किएका छन् भने धेरै क्षेत्रमा विद्युत सेवा अवरुद्ध भएको छ। उद्धारकर्मीहरू भग्नावशेषमा पुरिएका मानिसहरूको खोजी तथा उद्धारमा जुटेका छन्। अमेरिकी भूगर्भ सर्वेक्षणले ठूलो जनधनको क्षति हुन सक्ने चेतावनी दिएको छ।

भेनेजुएला सरकारले आपतकालीन अवस्था घोषणा गरेको छ। प्रभावित क्षेत्रमा घाइतेहरूको उपचार र आवश्यक स्वास्थ्य सेवा उपलब्ध गराउन विभिन्न राष्ट्रिय तथा अन्तर्राष्ट्रिय संस्थाहरू सक्रिय भएका छन्।

विशेषज्ञहरूका अनुसार भूकम्पपछि आउने परकम्प, भवन ढल्दा लाग्ने चोटपटक, खानेपानीको अभाव र सरुवा रोग फैलिने जोखिम बढ्न सक्छ। ठूलो संख्यामा मानिस विस्थापित हुन सक्ने भएकाले स्वास्थ्य र राहत व्यवस्थापन चुनौतीपूर्ण बन्ने देखिएको छ।

अन्तर्राष्ट्रिय राहत संस्थाहरूले औषधि, शल्यक्रिया सामग्री, प्राथमिक उपचारका सामग्री तथा अन्य आवश्यक स्वास्थ्य सहायता प्रभावित क्षेत्रमा पठाउने तयारी गरेका छन्।