कतारको अन्तिम क्षणको गोलले स्विट्जरल्यान्ड स्तब्ध, अंक बाँडियो

एजेन्सी। सान्ता क्लारा । चार वर्षअघि घरेलु भूमिमा भएको विश्वकपको निराशाजनक प्रदर्शनलाई बिर्साउने प्रयासमा रहेको कतारले विश्वकपको समूह चरणमा स्विट्जरल्यान्डविरुद्ध अन्तिम क्षणमा गोल गर्दै १–१ को अप्रत्याशित बराबरी निकालेको छ।

समूह चरणको महत्त्वपूर्ण खेलमा जित नजिक पुगेको स्विट्जरल्यान्ड इन्जुरी समयको चौथो मिनेटमा आत्मघाती गोलको शिकार बनेपछि अंक बाँड्न बाध्य भयो। कतारका बुआलेम खुखीको दबाबमा स्विट्जरल्यान्डका डिफेन्डर मिरो मुहेमले आफ्नै पोस्टमा बल छिराएपछि कतारले विश्वकप इतिहासकै पहिलो अंक हासिल गर्न सफल भयो।

खेलको १७औँ मिनेटमा ब्रिल एम्बोलोले पेनाल्टीमार्फत गोल गर्दै स्विट्जरल्यान्डलाई अग्रता दिलाएका थिए। कतारका गोलरक्षक महमुद अबुनादाले एम्बोलोलाई फल गरेपछि प्राप्त अवसरलाई उनले सहज रूपमा सदुपयोग गरेका थिए।

स्विट्जरल्यान्डले खेलभर दबाब बनाए पनि अवसरलाई गोलमा परिणत गर्न सकेन। टोलीले कुल २६ प्रहार गरेको थियो, जुन विश्वकपमा उसको अहिलेसम्मकै उच्च संख्या मानिएको छ। तर लगातार अवसर खेर जाँदा टोलीले जित गुमायो।

खेलपछि स्विट्जरल्यान्डका कप्तान ग्रानिट झाकाले प्रदर्शन अपेक्षाअनुसार नभएको स्वीकार गर्दै यस्तो प्रदर्शनले जित सम्भव नहुने प्रतिक्रिया दिए। अर्का खेलाडी डेनिस जाकारियाले पनि टोलीले आफ्नै कमजोरीका कारण महत्त्वपूर्ण दुई अंक गुमाएको बताए।

कतारका प्रशिक्षक जुलेन लोपेटेगुईले टोलीको आत्मविश्वास, अनुशासन र संघर्षशीलताको प्रशंसा गर्दै अन्तिमसम्म विश्वास कायम राखेकै कारण सकारात्मक नतिजा सम्भव भएको बताए।

विश्वकपको अघिल्लो संस्करणमा आयोजक राष्ट्रका रूपमा सहभागी कतार समूह चरणका तीनवटै खेलमा पराजित भएको थियो। यसपटक भने बलियो प्रतिद्वन्द्वीविरुद्ध अन्तिम समयमा प्राप्त बराबरीले टोलीलाई नयाँ आत्मविश्वास दिएको छ।

लगातार छैटौँ विश्वकप खेलिरहेको स्विट्जरल्यान्ड भने महत्त्वपूर्ण अंक गुमाएपछि समूह चरणको आगामी समीकरणमा दबाबमा परेको छ। टोलीले यसअघि छनोट चरणमा अपराजित रहँदै विश्वकप यात्रा तय गरेको थियो। तर कतारविरुद्धको बराबरीले उसको सुरुआती योजनामा धक्का पुगेको छ।