पूर्वदेखि पश्चिमसम्म खराब मौसमको पूर्वानुमान, सावधानी अपनाउन अनुरोध

काठमाडौँ । राष्ट्रिय विपद् जोखिम न्यूनीकरण तथा व्यवस्थापन प्राधिकरण ले देशका विभिन्न प्रदेशमा तीव्र हावाहुरीसहितको खराब मौसमको सम्भावना रहेको भन्दै सर्वसाधारणलाई सतर्कता अपनाउन अनुरोध गरेको छ । जल तथा मौसम विज्ञान विभाग का अनुसार वैशाख १६ गते बुधबार साँझदेखि कोशी प्रदेशको मोरङसहित आसपासका जिल्ला, मधेश प्रदेशका धनुषा र बारासहितका क्षेत्र, लुम्बिनी प्रदेशका बर्दिया, बाँके, दाङ र अर्घाखाँची तथा सुदूरपश्चिम प्रदेशका डडेलधुरा र डोटीसहितका जिल्लामा तीव्र गतिको हावाहुरी चल्ने सम्भावना रहेको छ ।

विभागले साँझ करिब ५:४५ बजेदेखि सुरु हुने हावाहुरी पर्सि बिहान करिब ७:४५ बजेसम्म जारी रहने अनुमान गरेको छ । साथै, मेघगर्जन, चट्याङ्ग, असिना र वर्षासहितको मौसम प्रणाली पश्चिमबाट पूर्वतर्फ सर्दै जाने सम्भावना रहेको जनाइएको छ ।

प्राधिकरणका अनुसार हावाहुरीका कारण रुख ढल्ने, कमजोर संरचना भत्किने, घरका छाना उड्ने तथा विद्युत् र सञ्चार सेवा प्रभावित हुने जोखिम रहन्छ । यस्तो अवस्थामा सकेसम्म घरबाहिर ननिस्कन, झ्यालढोका सुरक्षित रूपमा बन्द गर्न, कमजोर छाना मजबुत बनाउन र आगो बाल्दा विशेष सावधानी अपनाउन अनुरोध गरिएको छ ।

त्यस्तै, अग्ला रुख, कमजोर संरचना, बिजुलीका खम्बा तथा तारमुनि नबस्न, लत्रिएका तार नछुन र उडेर आउने वस्तुबाट हुन सक्ने चोटबाट बच्न सचेत रहन आग्रह गरिएको छ । मौसमसम्बन्धी अद्यावधिक जानकारी नियमित रूपमा हेर्दै आवश्यक सतर्कता अपनाउन पनि प्राधिकरणले सबैमा अपिल गरेको छ ।