नेपाल भ्रमणमा अमेरिकी प्रतिनिधि: लगानीदेखि सम्पदासम्म विशेष चासो

काठमाडौं । अमेरिकी सहायक सचिव पॉल कपुरको नेपाल भ्रमण सम्पन्न भएको छ। भ्रमणका क्रममा उनले राष्ट्रिय स्वतन्त्र पार्टीका सभापति रवि लामिछाने, परराष्ट्र मन्त्री शिशिर खनाल तथा अर्थ मन्त्री डा. स्वर्णिम वाग्लेसँग उच्चस्तरीय भेटवार्ता गरेका छन्। भेटका क्रममा नेपाल–अमेरिका साझेदारीलाई थप सुदृढ बनाउने, व्यापार तथा लगानीका अवसर विस्तार गर्ने विषयमा छलफल भएको जनाइएको छ। उनले नेपालबाट सहभागी हुने लगानी सम्मेलन प्रतिनिधिमण्डलसँग अमेरिकामा उपलब्ध लगानीका सम्भावनाबारे विचार आदानप्रदान गरेका थिए।

यसैबीच, अमेरिकी तथा नेपाली निजी क्षेत्रका प्रतिनिधिहरूसँगको अन्तरक्रियामार्फत नेपालमा विकसित हुँदै गएको प्रविधि क्षेत्रमा सहकार्यका सम्भावनाबारे समेत छलफल गरिएको थियो। भ्रमणका क्रममा कपुरले बौद्धनाथ स्तूप र पाटन दरबार क्षेत्रको अवलोकन गर्दै नेपालको समृद्ध इतिहास र सांस्कृतिक सम्पदासँग परिचित भएका थिए। यी सम्पदाको संरक्षणमा अमेरिकाले समेत सहयोग गर्दै आएको जनाइएको छ।