इजरायलको हवाई आक्रमणमा परि लेबनानमा २५० भन्दा बढीको मृत्यु

काठमाडौं । लेबनानमा इजरायलले ठूलो हवाई आक्रमण गर्दा २५० भन्दा बढी मानिसको ज्यान गएको छ। यो हिज्बुल्लाहसँगको द्वन्द्व सुरु भएयताको सबैभन्दा ठूलो र घातक हमला मानिएको छ।

समाचार अनुसार सयौँ मानिस घाइते भएका छन्, धेरैको अवस्था गम्भीर छ। राजधानी बेरुतमा मात्रै धेरै मानिसले ज्यान गुमाएका छन्। संयुक्त राष्ट्रसंघले यस घटनालाई निकै दुःखद र भयावह भन्दै चिन्ता व्यक्त गरेको छ।

आक्रमणका क्रममा केही मिनेटमै विभिन्न स्थानमा रहेका सैन्य संरचना र कमाण्ड केन्द्रमा हमला गरिएको बताइएको छ। त्यसको जवाफमा हिज्बुल्लाहले पनि इजरायलतर्फ रकेट प्रहार गरेको जनाएको छ।

घटनापछि उद्धार कार्य निकै कठिन भएको छ। एम्बुलेन्स अभाव हुँदा घाइतेलाई मोटरसाइकलमा अस्पताल लगिएको देखिएको छ। अस्पतालहरूले रगतको अभाव भएको भन्दै सहयोग मागेका छन्।

आक्रमणका कारण धेरै भवनहरू भत्किएका छन् र मानिसहरू अझै त्रासमा छन्।