काठमाडौं। प्रतिनिधिसभा निर्वाचनपछि नयाँ सरकार गठनबारे देखिएको राजनीतिक स्पष्टताले सेयर बजारमा सकारात्मक प्रभाव परेको छ। निर्वाचनपछि खुलेको पहिलो कारोबार दिनमै बजारमा तीव्र वृद्धि देखिँदा तीन चरणको अवरोध लागू हुँदै अन्ततः दिनभरका लागि कारोबार बन्द भएको छ। नेपाल धितोपत्र बजार परिसूचक एकैदिन ६ प्रतिशतले बढेपछि नियमअनुसार तेस्रो अवरोध लागू भई कारोबार स्थगित गरिएको हो।
बजार खुलेसँगै लगानीकर्ताको सक्रियता बढ्दै जाँदा सूचक निरन्तर उकालो लाग्यो। प्रारम्भिक चरणमै ४ प्रतिशत वृद्धि भएपछि केही समयका लागि कारोबार रोकिएको थियो। त्यसपछि पुनः खुलेको बजारमा वृद्धि जारी रहँदा ५ प्रतिशत पुगेसँगै दोस्रो चरणको अवरोध लागू गरी ४० मिनेटका लागि कारोबार स्थगित गरिएको थियो। त्यसपछि पुनः सुरु भएको केही समयमै सूचक ६ प्रतिशतले बढेपछि तेस्रो अवरोध लाग्दै दिनभरका लागि कारोबार बन्द गरिएको हो।
निर्वाचनपछि प्रतिनिधिसभाको प्रत्यक्षतर्फको मतगणना अन्तिम चरणमा पुगेको र समानुपातिकतर्फ पनि राष्ट्रिय स्वतन्त्र पार्टी अग्रस्थानमा रहेको अवस्थाले राजनीतिक स्थिरता आउने संकेत देखिएको छ। सोही कारण लगानीकर्तामा नयाँ सरकारप्रति भरोसा बढ्दा बजारमा तीव्र उत्साह देखिएको विश्लेषण गरिएको छ।
आजको छोटो समयको कारोबारमा नेपाल धितोपत्र बजार परिसूचक १६२ दशमलव ९३ अंकले बढेर २८७५ दशमलव ४३ विन्दुमा पुगेको छ। करिब दुई मिनेटको कारोबार अवधिमा २६१ कम्पनीका ११ लाख ४३ हजार कित्ता सेयर किनबेच हुँदा करिब ५५ करोड ५९ लाख रुपैयाँ बराबरको कारोबार भएको छ।
पछिल्लो समय लगातार सरकार परिवर्तन, नीतिगत अनिश्चितता र आर्थिक निर्णयमा ढिलासुस्तीका कारण लगानीकर्तामा अन्योलता देखिएको थियो। तर निर्वाचनपछि स्थिर सरकार बन्ने सम्भावना बढेसँगै अर्थतन्त्रमा सुधार हुने अपेक्षाले लगानीकर्ताको विश्वास बढेको छ। यही अपेक्षाले पुँजी बजारमा तीव्र वृद्धि देखिएको विश्लेषकहरूले बताएका छन्।
