इतिहासले ठूलो जिम्मेवारी दिएको छ: रवि लामिछाने

चितवन । राष्ट्रिय स्वतन्त्र पार्टीका सभापति रवि लामिछानेले नागरिकसमक्ष गरेका प्रतिबद्धता पूरा गर्दै अघि बढ्ने बताएका छन्। चितवन निर्वाचन क्षेत्र नम्बर २ बाट ५४ हजार ४०२ मत प्राप्त गरी विजयी भएका लामिछानेले निर्वाचन कार्यालयबाट प्रमाणपत्र ग्रहण गरेपछि सञ्चारकर्मीसँग कुरा गर्दै जनताले दिएको विश्वासलाई जिम्मेवारीका रूपमा लिएर काम गर्ने बताएका हुन्।

उनले इतिहासले आफूहरूलाई ठूलो जिम्मेवारी सुम्पिएको उल्लेख गर्दै आगामी दिनमा धैर्य, संयम र सुझबुझका साथ अघि बढ्ने बताए। जनताको अपेक्षा र चाहनाबारे आफूहरू सजग रहेको बताउँदै सबै वर्ग र समुदायलाई समेटेर अघि बढ्ने उनको भनाइ छ।

लामिछानेले फरक मत राख्ने नागरिकको सम्मान गर्ने प्रतिबद्धता व्यक्त गर्दै कार्यकर्तालाई उत्साहमा कसैप्रति दुर्व्यवहार नगर्न पनि आग्रह गरे। जनताको अपेक्षा अनुसार काम गर्न नसके वर्तमानमा कमजोर बनेका केही दलजस्तै अवस्था आउन सक्ने चेतावनी समेत उनले दिएका छन्।