भाषा परीक्षा उत्तीर्ण तर दक्षिण कोरिया नजान पाएका युवाहरूले काठमाडौंमा प्रदर्शन

काठमाडौ। रोजगार अनुमति प्रणाली (इपिएस) अन्तर्गत भाषा तथा सीप परीक्षा उत्तीर्ण गरिसकेका युवा लामो समयसम्म दक्षिण कोरिया जान नपाएको भन्दै काठमाडौंमा प्रदर्शनमा उत्रिएका छन्।

मंगलबार माइतिघरमा भएको प्रदर्शनमा मुख्यतः कृषि तथा पानीजहाज क्षेत्रमा कामका लागि रोस्टरमा रहेका युवाहरूले सहभागी भएका थिए। उनीहरूले रोस्टरमा वर्षदिनभन्दा लामो समयसम्म नाम रहँदा पनि रोजगारदाताबाट छनोट नपरेको, नाम हटिने नजिक पुगेको, र दोब्बर समयसम्म रोस्टरको अवधि बढाइदिन माग गरे।

झापाकी अनिषा बस्नेतले रोस्टरको म्याद सकिन लागेकाले थप अवधि आवश्यक भएको बताइन्। प्रदर्शनकारीहरूले ‘इपिएसको लुट धन्दा बन्द गर’, ‘कृषि तथा पानीजहाजको रोस्टर अवधि थप गर’, ‘पासरलाई छिटो कोरिया लगियोस’, ‘२ वर्ष म्याद थप गरियोस’ जस्ता प्लेकार्डहरू लिएर आवाज उठाएका थिए।

उनीहरूले सरकारसँग इपिएस अन्तर्गत भाषा तथा सीप परीक्षा उत्तीर्ण युवाहरूको रोजगार सुनिश्चित गर्न आवश्यक कदम चाल्न अनुरोध समेत गरेका छन्।