नेपाल–कतार मित्रताको प्रतीकः एक जोडी हात्ती कतारलाई औपचारिक हस्तान्तरण

काठमाडौं । नेपाल सरकारले मैत्रीपूर्ण कूटनीतिक सम्बन्धको प्रतीकस्वरूप कतार राज्यलाई एक जोडी हात्ती औपचारिक रूपमा हस्तान्तरण गरेको छ। भैरहवास्थित गौतमबुद्ध अन्तर्राष्ट्रिय विमानस्थलमा आज आयोजित विशेष समारोहका बीच उक्त हात्ती कतार सरकारलाई प्रदान गरिएको हो।

नेपाल सरकार तथा नेपाली जनताका तर्फबाट राष्ट्रपति रामचन्द्र पौडेलले कतारका अमिर शेख तमिम बिन हमाद अल थानीको नेपाल भ्रमण (२३–२४ अप्रिल २०२४) का अवसरमा यसबारे औपचारिक घोषणा गर्नुभएको थियो। उक्त घोषणा कतार सरकारले कूटनीतिक माध्यमबाट गरेको अनुरोधको प्रत्युत्तरस्वरूप तथा मन्त्रिपरिषद्को २०८१ कात्तिक २ गतेको निर्णयअनुसार कार्यान्वयन गरिएको हो।

कतारलाई प्रदान गरिएका हात्तीहरू चितवन राष्ट्रिय निकुञ्जअन्तर्गत खोरसोरस्थित हात्ती प्रजनन केन्द्रमा जन्मिएका हुन्। छ वर्षीय भाले हात्ती ‘खगेन्द्र प्रसाद’ र सात वर्षीया पोथी हात्ती ‘रुद्रकाली’लाई कतारको अल खोर पार्क चिडियाखानामा राखिनेछ।

हात्ती हस्तान्तरणअघि नेपालबाट गएको प्राविधिक टोलीले अल खोर पार्क चिडियाखानाको व्यवस्थापन, आवास र हेरचाह प्रणालीको विस्तृत अध्ययन गरेको थियो। नेपालका प्रचलित कानुन तथा अन्तर्राष्ट्रिय सन्धि–सम्झौताअनुसार आवश्यक प्रक्रिया पूरा गरी सिटिस (CITES) अनुमति र स्वास्थ्य प्रमाणीकरणपछि कतार एयरवेजको विशेष कार्गो विमानमार्फत हात्ती दोहा पठाइएको हो।

समारोहमा नेपाल सरकारका सचिव डा. राजेन्द्रप्रसाद मिश्र, परराष्ट्र मन्त्रालय, राष्ट्रिय निकुञ्ज तथा वन्यजन्तु संरक्षण विभाग, नेपाली सेना, नेपालस्थित कतार दूतावास, चितवन राष्ट्रिय निकुञ्ज तथा सञ्चारकर्मीहरूको उपस्थिति रहेको थियो। साथै, हात्तीको हेरचाह र अनुकूलनका लागि दुई जना माहुत र एक प्राविधिकलाई एक महिनाका लागि कतार पठाइएको छ।

नेपाल र कतारबीचको यो पहलले द्विपक्षीय सम्बन्ध थप सुदृढ बनाउने, वन्यजन्तु संरक्षणमा सहकार्य बढाउने तथा नेपाली श्रमिकका लागि रोजगारीका अवसर प्रवर्द्धन गर्ने विश्वास लिइएको छ।