काठमाडौं। एमसीए–नेपालले मिलेनियम च्यालेन्ज कर्पोरेसन (एमसीसी) नेपाल कम्प्याक्ट अन्तर्गत सडक मर्मत तथा पुनःस्थापनाका लागि कुल २३.६६ मिलियन अमेरिकी डलर बराबरका दुई महत्वपूर्ण सम्झौता सम्पन्न गरेको छ। यी सम्झौताले नेपालको प्रमुख सडक पूर्वाधारलाई सुदृढ बनाउँदै दीर्घकालीन आर्थिक वृद्धिमा योगदान पुर्याउने विश्वास लिइएको छ।
सम्झौता अनुसार लुम्बिनी प्रदेशको दाङ जिल्लामा पर्ने पूर्व–पश्चिम राजमार्गको धनखोला–लमही खण्डमा फुल–डेप्थ रिक्लेमेसन तथा सुपरपेभ प्रविधि प्रयोग गरी सडक पुनःस्थापनाका लागि शर्मा–कुमार संयुक्त उपक्रमसँग २० मिलियन अमेरिकी डलरको निर्माण सम्झौता गरिएको छ।
यस्तै, उक्त सडक खण्डको सुपरिवेक्षण तथा नारायणघाट–मुग्लिन सडक खण्डको आवधिक मर्मतसम्भारका लागि इन्टरकन्टिनेन्टल कन्सल्टेन्ट्स एण्ड टेक्नोक्र्याट्स प्रा.लि. (आईसीटी) सँग ३.६६ मिलियन अमेरिकी डलरको परामर्श सम्झौता सम्पन्न गरिएको छ।
सम्झौता हस्ताक्षर समारोहमा नेपाल सरकारका वरिष्ठ अधिकारीहरू, अमेरिकी राजदूत थम्पसन, एमसीए–नेपालका कार्यकारी निर्देशक खड्ग बिष्ट, एमसीसीका उप–देश निर्देशक सञ्जय पौड्याल तथा एमसीए–नेपाल बोर्डका सदस्यहरूको उपस्थिति रहेको थियो।
कार्यक्रममा बोल्दै राजदूत थम्पसनले यो पहल केवल एक लगानी मात्र नभई अमेरिका–नेपाल साझेदारीको मजबुती, एमसीसी नेपाल कम्प्याक्टको निरन्तर प्रगति, तथा नेपाली जनता र नेपालमा क्रियाशील अमेरिकी व्यवसायका लागि समयमै देखिने र व्यवहारिक परिणाम सुनिश्चित गर्ने साझा प्रतिबद्धताको प्रतीक भएको उल्लेख गर्नुभयो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
