विपद् उद्धार र खेलकुदमा उत्कृष्ट सशस्त्र प्रहरीलाई विशेष मिसन अवसर

काठमाडौँ । सशस्त्र प्रहरीका उद्दार र खेलकुदमा उत्कृष्ट काम गर्ने ५ जना कर्मचारीले यूएन मिसनमा सिधै सहभागी हुने अवसर पाएका छन् । सशस्त्र प्रहरीमा राष्ट्र संघीय शान्ति मिसनका लागि तोकिएको भीआइपी कोटा खारेज भएको छ। प्रहरी महानिरीक्षक राजु अर्यालले सो कोटामा उद्धार र खेलकुदमा राम्रो कार्य गर्ने मिसनमा पठाउने भएका छन्। उत्कृष्ट कार्यलाई भिआइपी कोटा भन्दै दबाब दिने परिपाटीको अन्त्य भइ उद्धार र खेलकुदमा राम्रो कार्य गर्ने ५ जना सशस्त्र प्रहरी कर्मचारीहरूलाई यू।एन। मिसनमा सिधै सहभागी हुने अवसर दिइएको सशस्त्र प्रहरी बलका सहायक प्रवक्ता डिएसपी शैलेन्द्र थापाले जानकारी दिए।

सशस्त्र प्रहरी बल नेपालले विपद् उद्धारमा सक्रिय रूपमा काम गर्ने, उत्कृष्ट सेवा गर्ने र खेलकुदमा देशको नाम उज्यालो बनाउने आफ्ना कर्मचारीलाई विशेष मिसनमा सहभागी हुने अवसर दिएको छ। गोताखोर तथा विपद् व्यवस्थापन तालिम लिई आपत् परेको समयमा निरन्तर खटिने, २०८१ सालमा ‘वर्ष जवान’ घोषित हुने तथा राष्ट्रिय–अन्तर्राष्ट्रिय प्रतियोगितामा राम्रो प्रदर्शन गर्ने खेलाडीलाई यो अवसर प्रदान गरिएको सशस्त्र प्रहरी बलले जनाएको छ।

यसमा सहभागी सशस्त्र प्रहरी सहायक निरीक्षक दीपेन्द्र विष्टले देशका विभिन्न स्थानमा विपद्का बेला १९ पटकसम्म खटिएर १० जनालाई जीवितै उद्धार गरेका छन्। साथै उनले ११ जनाको शव निकाल्नुका साथै २ जना पर्यटकलाई पनि सकुशल बचाउन सफल भएका थिए। त्यस्तै, सशस्त्र प्रहरी सहायक हवल्दार भरत काफ्लेले गत चैत १३ गते इटहरीको सेन्टर प्लाजामा भएको आगलागीमा फसेका ११ जनामध्ये ५ जनालाई रोप रेस्क्यु प्रविधिबाट उद्धार गरेका थिए। उनले अन्य घटनामा खटिँदा १५ जनाको शव पनि निकालेका छन्।

सशस्त्र प्रहरी सहायक हवल्दार मेखबहादुर गुरुङ गोताखोर तालिम प्राप्त प्रशिक्षक हुन्। उनले २२ जनाको शव निकाल्नुका साथै विदेशी नागरिकको उद्धारमा पनि भूमिका खेलेका छन्। उत्कृष्ट सेवाका कारण ‘वर्ष जवान–२०८१’ घोषित भएका किरणबहादुर भण्डारीलाई पनि मिसनको अवसर दिइएको छ। साथै, बक्सिङमा १२ पदक जितेका एपीएफका खेलाडी पुरन राईलाई पनि यो अवसर प्रदान गरिएको हो।