बक्यौता भुक्तानीमा टेलिकमले छुट,नतिरे कालोसूचीमा राख्ने

काठमाडौँ: नेपाल टेलिकमले आर्थिक वर्ष २०७९/८० सम्मका बक्यौता रकम माघ मसान्तभित्र तिरेमा जरिवानामा छुट दिने भएको छ।

आइतबार टेलिकमको केन्द्रीय राजस्व विभागले जारी गरेको सूचनाअनुसार, तोकिएको समयमा बक्यौता रकम चुक्ता गर्ने ग्राहकहरूले जरिवानाबाट मुक्त रहन सक्नेछन्।

सूचनामा उल्लेख छ कि टेलिकमले प्रदान गर्ने दूरसञ्चार सेवाबापत बाँकी रहेको आर्थिक वर्ष २०७९/८० को रकम १ मंसिरदेखि माघ मसान्तभित्र भुक्तानी गरेमा जरिवाना छुट प्राप्त हुनेछ।

साथै, बक्यौता भुक्तानी नगर्ने ग्राहकहरूको नाम पत्रिकामा प्रकाशित वा कम्पनीको वेबसाइटमा कालोसूचीमा राखिने चेतावनी पनि दिइएको छ।

नेपाल टेलिकमले समयमै भुक्तानी गर्ने ग्राहकलाई राहत प्रदान गर्दै वित्तीय अनुशासनमा सुधार ल्याउने उद्देश्यले यो कदम उठाएको जनाएको छ।