कर्जा प्रवाह कमजोर, तरलता बढ्दा बैंकहरूको निक्षेप दर फेरि घट्यो

काठमाडौं ।मंसिर महिनाका लागि वाणिज्य बैंकहरूले प्रकाशित गरेका नयाँ ब्याजदर सूचीअनुसार मुद्दती निक्षेपमा बैंकहरूले दिने अधिकतम ब्याजदर औसतमा झनै घटेको छ। २० वटै वाणिज्य बैंकले सार्वजनिक गरेको दर सूची विश्लेषण गर्दा कात्तिक महीनाको तुलनामा मंसिरमा व्यक्तिगत मुद्दती निक्षेपको औसत अधिकतम ब्याजदर ०.१६० प्रतिशत बिन्दुले कमी भएको देखिन्छ।

कात्तिकमा व्यक्तिगत मुद्दतीको औसत अधिकतम ब्याजदर ५.२००५ प्रतिशत थियो भने मंसिरमा यो घटेर ५.०४०५ प्रतिशत पुगेको छ।
व्यक्तिगत मुद्दतीमा सबैभन्दा धेरै ब्याजदर ६ प्रतिशत कायम राख्ने ग्लोबल आईएमई बैंकले ३ वर्ष वा सोभन्दा बढी अवधिका निक्षेपका लागि सो दर लागू गरेको छ।

१० बैंकले दर घटाए, १० ले स्थिर राखे

मंसिरमा कात्तिकको तुलनामा १० बैंकले ब्याजदर घटाएका छन्, जबकि १० बैंकले कात्तिकमै रहेजस्तो स्थिर राखेका छन्।
दर घटाउने बैंकहरूमा–
एनआईसी एशिया, प्राइम कमर्सियल, स्टान्डर्ड चार्टर्ड, नबिल, सिद्धार्थ, कुमारी, सानिमा, हिमालयन, नेपाल एसबीआई र सिटिजन्स पर्छन्।

दर स्थिर राख्ने बैंकहरू–
कृषि विकास, एभरेस्ट, नेपाल बैंक, लक्ष्मी सनराइज, माछापुच्छ्रे, प्रभु, राष्ट्रिय वाणिज्य, ग्लोबल आईएमई, नेपाल इन्भेस्टमेन्ट मेगा र एनएमबी रहेका छन्।

तरलता प्रशस्त, कर्जा प्रवाह कमजोर, ब्याजदर घट्दै

विगत केही महिनादेखि बै‌ंकिङ प्रणालीमा लगानीयोग्य रकम प्रशस्त छ तर कर्जा प्रवाह भने अपेक्षाकृत कमजोर छ। कर्जा विस्तार हुन नसक्दा बैंकहरूमा थापिएको तरलताले निक्षेप दरमा दबाब परेको छ।
निक्षेपको ब्याजदर घटेपछि बचत खातादेखि संस्थागत मुद्दतीसम्मका निक्षेपमा पर्न जाने दर स्वतः घट्ने बैंकहरू बताउँछन्।
निक्षेप दर घट्दै गएसँगै आधार दर तल झर्ने भएकाले कर्जाको ब्याजदर पनि क्रमशः घट्ने प्रवृत्ति देखिएको छ।

राष्ट्र बैंकले लामो अवधिका लागि समेत तरलता संकलन गर्ने नीति अवलम्बन गरिरहेको छ। हाल तोकिएको नीतिगत दर ४.५ प्रतिशत, स्थायी तरलता सुविधा दर ६ प्रतिशत र स्थायी निक्षेप सुविधा दर २.७५ प्रतिशत छ। यी दरहरूले पनि बैंकिङ क्षेत्रको ब्याजदर संरचनामा प्रत्यक्ष प्रभाव पारिरहेका छन्।

व्यक्तिगत मुद्दती निक्षेपका बैंक अनुसार ब्याजदर (कात्तिक–मंसिर)