कामना सेवा विकास बैंकको १९औं वार्षिकोत्सवमा पाँचौं फूटसल कप सम्पन्न

काठमाडौँ । कामना सेवा विकास बैंकले आफ्नो १९औं वार्षिकोत्सवको अवसरमा आयोजना गरेको कामना सेवा फूटसल कपको पाँचौं संस्करण शनिबार भव्य रूपमा सम्पन्न गरेको छ। प्रतियोगितामा बैंक तथा वित्तीय क्षेत्रका महिला र पुरुष टिमहरूले प्रतिस्पर्धा गरेका थिए।

पुरुषतर्फको फाइनल खेलमा सिद्धार्थ बैंकले उत्कृष्ट प्रदर्शन गर्दै प्राइम कमर्सियल बैंकलाई २–० ले पराजित गर्दै उपाधि हात पारेको छ। त्यसैगरी, महिलातर्फको फाइनल खेलमा डिफेन्डिङ च्याम्पियन लुम्बिनी विकास बैंकले ग्लोबल आइएमई बैंकलाई १–० गोलअन्तरले हराउँदै यस सिजनको उपाधि कायम राख्न सफल भएको छ।

वार्षिकोत्सवको अवसरमा हरेक वर्ष जस्तै यस वर्ष पनि कामना सेवा बैंकले फूटसल प्रतियोगिता आयोजना गरेको हो। विजेता तथा उपविजेता टिमलाई ट्रफी, मेडल, प्रमाणपत्र र पुरस्कार प्रदान गरिएको थियो।

प्रतियोगिताको उद्घाटन बैंकका डेपुटी सीईओ विनय दाहालले एन्फा रेफ्री अञ्जना सुनुवारलाई बल हस्तान्तरण गर्दै गर्नुभएको थियो। सो अवसरमा बैंकका वरिष्ठ अधिकृत, विभागीय प्रमुख तथा कर्मचारीहरूको उपस्थिती रहेको थियो।

समापन समारोहमा मुख्य सञ्चालन अधिकृत विकास ढुंगानाले विजेता तथा उपविजेताहरुलाई पुरस्कार वितरण गर्नुभयो। यस वर्षको प्रतियोगितामा पुरुषतर्फ १७ टिम र महिलातर्फ ९ टिमले सहभागिता जनाएका थिए।

यसै क्रममा बैंकले आफ्नो १९औं वार्षिकोत्सवको अवसरमा आउँदो कार्तिक २७ गते बिहीबार देशभरका शाखामार्फत रक्तदान कार्यक्रम आयोजना गर्ने घोषणा गरेको छ। बैंकका अनुसार, समाजप्रतिको जिम्मेवारी वहन गर्ने उद्देश्यले आयोजित रक्तदान कार्यक्रमले संस्थाको सामाजिक उत्तरदायित्व (CSR) अभियानलाई अझ प्रभावकारी बनाउन सहयोग गर्नेछ।

कामना सेवा बैंकले विगतदेखि नै खेलकुद, स्वास्थ्य र सामाजिक क्षेत्रका गतिविधिहरूमा सक्रिय सहभागिता जनाउँदै आएको छ। फूटसल कपजस्ता कार्यक्रमहरूले कर्मचारीबीच आपसी सहयोग र स्वस्थ प्रतिस्पर्धाको भावना प्रवर्द्धन गर्ने उद्देश्य बोकेको बैंकले जनाएको