त्रिवि र सिटिइभिटी प्रभावित, पुनः परीक्षा लिन तयारी सुरु,विद्यार्थीले पुनः परीक्षा अस्वीकार, वैकल्पिक मूल्याङ्कनको माग

काठमाडौँ । गत भदौमा जेन-जी आन्दोलनका क्रममा भएको आगजनी र तोडफोडका कारण प्राविधिक शिक्षा तथा व्यावसायिक तालिम परिषद् (सिटिइभिटी) र त्रिभुवन विश्वविद्यालय (त्रिवि) का करिब १९ हजार परीक्षार्थीको उत्तरपुस्तिका जलेर नष्ट भएको छ। परीक्षापछि सुरक्षा प्रयोजनका लागि प्रहरी चौकीमा राखिएका उत्तरपुस्तिका प्रदर्शनकारीले लगाएको आगोमा जलेका हुन्।

सिटिइभिटीका अनुसार, डिप्लोमा र प्रि-डिप्लोमा तहका १६,८८३ विद्यार्थीका करिब ६० हजार उत्तरपुस्तिका नष्ट भएका छन्। परीक्षा उपनियन्त्रक दीपिका शर्माका अनुसार कोशी प्रदेशका ५ र बागमती प्रदेशका १८ गरी २३ परीक्षा केन्द्रका उत्तरपुस्तिका जलेका हुन्। उनले पुनः मूल्याङ्कन असम्भव भएकाले परीक्षा समितिले मंसिर ४ गते पुनः परीक्षा सञ्चालन गर्ने निर्णय गरिसकेको जानकारी दिइन्।

परिषद्का सदस्य–सचिव महेश भट्टराईले विद्यार्थीको भविष्य सुरक्षित राख्न र विश्वस्तरीय प्रतिस्पर्धामा सक्षम बनाउन वैकल्पिक उपाय नभएकाले पुनः परीक्षा अनिवार्य रहेको बताए।

तर, विद्यार्थीहरूले भने पुनः परीक्षा दिन अस्वीकार गर्दै वैकल्पिक मूल्याङ्कनको माग गरेका छन्। उनीहरूले संघर्ष समिति गठन गरी परिषद्को निर्णय फिर्ता लिन माग गर्दै आन्तरिक मूल्याङ्कन, प्रायोगिक अंक वा अन्य प्रमाणित विधिबाट नतिजा प्रकाशन गर्नुपर्ने ६ बुँदे मागपत्र बुझाएका छन्। परिषद्ले उत्तरपुस्तिका सुरक्षित राख्न नसक्नु लापरवाही भएको विद्यार्थीहरूको आरोप छ।

यस्तै, सोही घटनामा त्रिभुवन विश्वविद्यालयका करिब डेढ हजार विद्यार्थीको उत्तरपुस्तिका पनि जलेर नष्ट भएको छ। परीक्षा नियन्त्रक सूर्यप्रसाद कलौनीका अनुसार स्नातक तहको व्यवस्थापन, शिक्षा र मानविकी संकायका आंशिक परीक्षार्थी प्रभावित भएका छन्। झापा, रौतहट, दाङ र काभ्रेका विभिन्न क्याम्पसबाट संकलित उत्तरपुस्तिका जलेपछि त्रिविले पनि पुनः परीक्षा लिने निर्णय गरिसकेको छ।