मन्त्री घिसिङ : ‘अनुहार हेरेर आयोजना अलपत्र राख्न पाइँदैन’

काठमाडौँ । लामो समयदेखि काम रोकिएर अलपत्र बनेका विकास आयोजनाहरू अब तोडिने भएका छन्। ऊर्जा, जलस्रोत तथा सिँचाइ, भौतिक पूर्वाधार र शहरी विकास मन्त्रालय अन्तर्गतका जीर्ण आयोजनालाई तोडेर नयाँ ठेक्का प्रक्रियामा लैजाने निर्णय गरिएको हो।

मन्त्री कुलमान घिसिङले तीनवटै मन्त्रालयका सचिव र विभागीय प्रमुखलाई तत्काल जीर्ण आयोजनाको सूची तयार गरी पेश गर्न निर्देशन दिएका छन्। उनले काम नगर्ने ठेकेदारको अनुहार हेरेर आयोजना अलपत्र राख्न नपाइने भन्दै समयमै गुणस्तरअनुसार काम नगरे पुनः ठेक्का तोडिने चेतावनी दिएका छन्।

उनका अनुसार ठूला पूर्वाधार आयोजनाहरू समयमा सम्पन्न नहुँदा मुलुकले ठूलो आर्थिक क्षति भोगिरहेको छ भने नागरिक लाभबाट वञ्चित भइरहेका छन्। उनले भने, “अब निर्णय नगरी काम हुँदैन, जीर्ण आयोजनाको ठेक्का तोडेर नयाँ प्रक्रिया अघि बढाउनुपर्छ।”

हाल सिँचाइअन्तर्गत राष्ट्रिय गौरवको सुनकोशी मरिण बहुउद्देश्यीय आयोजना, भौतिक पूर्वाधार अन्तर्गत तीन समयभन्दा बढी ढिलो भएका सडक र करिब एक सय पुल निर्माण आयोजना अलपत्र अवस्थामा छन्।