ट्रम्पले अमेरिकी रक्षा मन्त्रालयलाई युद्ध मन्त्रालय नाम दिने तयारी

काठमाडौँ। अमेरिकी राष्ट्रपति डोनाल्ड ट्रम्पले अमेरिकी रक्षा मन्त्रालयको नाम परिवर्तन गरी पुनः युद्ध मन्त्रालय बनाउने कार्यकारी आदेशमा हस्ताक्षर गर्ने तयारी गरेका छन्। ह्वाइट हाउसका एक वरिष्ठ अधिकारीका अनुसार ट्रम्पले शुक्रबारै यस आदेशलाई कार्यान्वयनमा ल्याउन चाहेका हुन्।

फक्स न्यूज डिजिटललाई दिएको पुष्टिमा स्रोतले भने अनुसार, ट्रम्पले नयाँ आदेशमार्फत अमेरिकी रक्षामन्त्री पीट हेगसेथलाई स्थायी रूपमा ‘युद्ध मन्त्रालय’ नाम पुनर्स्थापना गर्न आवश्यक विधायीक तथा कार्यकारी प्रक्रिया अघि बढाउन निर्देशन दिनेछन्।

यस निर्णयसँगै पेन्टागनमा रहेका सार्वजनिक वेबसाइटहरू, कार्यालयका बोर्डहरू, पत्रप्रमुख (लेटरहेड) लगायत विभिन्न आधिकारिक कागजात र संरचनामा व्यापक परिमार्जन गर्नुपर्ने आवश्यकता रहनेछ।

ट्रम्पले हालैका दिनहरूमा सार्वजनिक कार्यक्रमहरूमा रक्षा मन्त्रालयको नाम परिवर्तन गर्ने संकेत गरेका थिए। उनका अनुसार, पहिलो र दोस्रो विश्वयुद्ध अमेरिकाले ‘युद्ध मन्त्रालय’ नाम रहँदा जितेको थियो। त्यसैले, उनले विजय र नैतिकताको प्रतीक स्वरूप पुनः सोही नाम कायम गर्नुपर्ने विचार प्रस्तुत गरेका छन्।

अमेरिकी रक्षामन्त्रीले पनि ट्रम्पको अभिप्रायलाई समर्थन जनाउँदै, नयाँ नामले सैनिकहरूको नैतिकता उच्च राख्ने र शत्रुमाथि घातक प्रभाव पार्ने बताए।

इतिहासमा अमेरिकाले सन् १७८९ देखि १९४९ सम्म आफ्नो रक्षा मन्त्रालयलाई ‘युद्ध मन्त्रालय’ भनेर चिन्दथ्यो। तर १९४९ मा सो नाम हटाई औपचारिक रूपमा ‘रक्षा मन्त्रालय’ नाम दिइएको थियो। ट्रम्पको नयाँ प्रस्तावले पुनः ७५ वर्षपछि पुरानो नामलाई फर्काउने संकेत गरेको छ।

विश्लेषकहरूका अनुसार, ट्रम्पको यो कदम अमेरिकाको सैन्य नीति र राष्ट्रिय सुरक्षा दृष्टिकोणमा गहिरो प्रभाव पार्नेछ। समर्थकहरूले यसलाई अमेरिकी शक्ति र ऐतिहासिक गौरवसँग जोडेर व्याख्या गरिरहेका छन् भने आलोचकहरूले नाम परिवर्तनले व्यावहारिक लाभ भन्दा प्रतीकात्मक मात्र हुने तर्क गरेका छन्।

अब ट्रम्पको कार्यकारी आदेश स्वीकृत भएसँगै पेन्टागन र अमेरिकी प्रशासनमा व्यापक संरचनागत र प्रशासनिक परिवर्तनका तयारी थालिने अनुमान गरिएको छ।