नवनियुक्त आइजिपी खापुङलाई दर्ज्यानी चिन्ह प्रदान

काठमाडौँ । नेपाल प्रहरीका नयाँ प्रमुख चन्द्र कुवेर खापुङलाई बिहीबार गृह मन्त्रालयमा आयोजित कार्यक्रममा दर्ज्यानी चिन्ह (फुली) लगाइदिएको छ। गृह सचिव गोकर्णमणि दुवाडीले उनलाई फुली लगाउँदै औपचारिक रूपमा प्रहरी महानिरीक्षक (IGP) को जिम्मेवारी हस्तान्तरण गरेका हुन्।

सरकारले भदौ १३ गतेको मन्त्रिपरिषद् बैठकमा खापुङलाई नेपाल प्रहरीको ३२औँ महानिरीक्षक नियुक्त गरेको थियो। चिन्ह प्राप्त गर्दै खापुङले सरकारबाट पाएको जिम्मेवारी इमानदारी, अनुशासन र प्रभावकारी तरिकाले पूरा गर्ने प्रतिवद्धता जनाए। उनले ड्युटीका क्रममा ज्यान गुमाएका प्रहरीहरूलाई श्रद्धाञ्जली अर्पण गरे भने घाइते प्रहरीहरूको सहज जीवनको कामना पनि गरे।

उनले भने, “यो जिम्मेवारी मैले पूर्ण निष्ठा र सेवा भावका साथ पूरा गर्नेछु।” साथै, आफ्नो कार्यकालमा नागरिकको राज्यप्रति विश्वास बढाउने काममा लागिरहने बताए। तर हालको कानुन अनुसार, खापुङको कार्यकाल धेरै लामो नहुनेछ। यदि नयाँ प्रहरी विधेयक पास भएन भने उनले जम्मा २ महिना ७ दिन मात्र IGP को जिम्मा सम्हाल्ने छन्। तेह्रथुममा जन्मिएका खापुङ २०५२ सालमा प्रहरी सेवा प्रवेश गरेका हुन् र देशका विभिन्न स्थानमा काम गरिसकेका छन्।