अब पोखराबाट छेन्दु हुँदै अष्ट्रेलिया उडान हुने

काठमाडौँ — पोखरा अन्तर्राष्ट्रिय विमानस्थलबाट चाँडै अष्ट्रेलियासम्म उडान सुरु हुने भएको छ। चीनको सिचुवान एयरलाइन्सले पोखराबाट छेन्दु (चीन) हुँदै अष्ट्रेलिया उडान गर्नका लागि तयारी गरिरहेको छ। यसका लागि एयरलाइन्सले नेपाल नागरिक उड्डयन प्राधिकरणसँग अनुमति मागेको छ।

प्राधिकरणका सूचना अधिकारी ज्ञानेन्द्र भूलका अनुसार उडान अनुमति सम्बन्धमा अनौपचारिक छलफल भइसकेको छ, अब प्रक्रिया पूरा गरेर अनुमति दिने तयारी भइरहेको छ। सिचुवान एयरलाइन्सले यो सेवा आगामी सेप्टेम्बर महिनाबाट सुरु गर्ने योजना बनाएको छ।

यसअघि २०८० साल असार ६ गते सिचुवान एयरलाइन्सको एयरबस A319 जहाजले पहिलोपटक पोखरा विमानस्थलमा उडान भरेको थियो। यो नयाँ उडान सेवा सुरु भएपछि पोखराबाट अष्ट्रेलिया जान चाहने यात्रुहरूका लागि निकै सहज हुनेछ।