म्यादी प्रहरीको लागि तलबभत्तामा मात्रै ५ अर्ब रुपैयाँभन्दा बढी खर्च हुने

स्थानीय चुनावको लागि भनेर करिब १ लाख म्यादी प्रहरी भर्ना गर्ने तयारीमा सरकार रहेको छ । निर्वाचन सुरक्षामा सेना, प्रहरी र सशस्त्र प्रहरी बलका साथै ठूलो संख्यामा म्यादी प्रहरी परिचालन गर्न लागिएको छ । यसका लगि चाहिने म्यादी प्रहरी जनशक्तिको प्रारम्भिक खाका बनाएको छ  ।प्रहरी प्रवक्ता विष्णुकुमार केसीका अनुसार तलबभत्तामा मात्रै ५ अर्ब रुपैयाँभन्दा बढी खर्च हुने अनुमान गरिएको छ । दुई महिनाका लागि भर्ना गर्दा एक जना जवानको मासिक तलब करिब २३ हजार रुपैयाँका दरले साढे ४ अर्ब रुपैयाँ खर्च हुन्छ । रासन भत्ता जिल्लाअनुसार फरक हुनेछ । उपत्यकामा कार्यरत प्रहरीले रासनबापत प्रतिमहिना करिब ५ हजार ५ सय पाउँछन् । यो आँकडाअनुसार १ लाख म्यादी प्रहरीलाई २ महिनाको रासन भत्तामा ५५ करोडभन्दा बढी खर्च हुन्छ । एकसरो पोसाकबापतको भत्ता छुट्टै उपलब्ध गराउनुपर्छ ।