अरनिको राजमार्गको विस्तारमा अवरोध, ठेकेदार कम्पनीको ठेक्का खारेज

काभ्रेपलाञ्चोक । सडक डिभिजन कार्यालय भक्तपुरले अरनिको राजमार्गअन्तर्गत निर्माणाधीन धुलिखेल–खावा सडकखण्डको ठेक्का रद्द गरेको छ। निर्माण कार्यमा निरन्तर ढिलाइ भएपछि कार्यालयले सार्वजनिक सूचनामार्फत उक्त निर्णयको जानकारी गराएको हो।

कार्यालयले मंगलबार बसेको बैठकमा सडक विस्तारका लागि सम्झौता गरिएअनुसार तोकिएको समयमा निर्माण सम्पन्न नभएकाले ठेक्का खारेज गर्ने निर्णय लिएको थियो। धुलिखेलदेखि खावासम्मको चार किलोमिटर सडक निर्माणका लागि विसं २०७९ जेठ २० गते गौरी पार्वती निर्माण सेवा प्रालिले २० करोड १९ लाख ४६ हजार पाँच सय एक रुपैयाँमा ठेक्का लिएको थियो। सम्झौताअनुसार २०८० चैत १९ गतेभित्र काम सम्पन्न हुनुपर्ने भए पनि ठेकेदार कम्पनीले तोकिएको अवधिभन्दा ११ महिना बढी समय बित्दा पनि निर्माण कार्य पूर्णरूपमा सम्पन्न गर्न सकेको थिएन। पछिल्लो वर्षदेखि निर्माण कार्य प्रायः ठप्प नै रहेको थियो।

स्थानीय सडक उपभोक्ताले निर्माण ढिलाइप्रति असन्तुष्टि जनाउँदै पटकपटक गुनासो गरेका थिए। यात्रुहरूले लामो समयदेखि सास्ती खेप्नुपरेपछि संसद्को पूर्वाधार समितिले समेत अनुगमन गरेको थियो। सडक डिभिजनले पटकपटक ताकेता गरे पनि ठेकेदार कम्पनीले प्रभावकारी काम नगरेपछि अन्ततः गत माघ १९ गते पुनः स्पष्टीकरण मागिएको थियो। कार्यालयका अनुसार कम्पनीले लिखित रूपमा जवाफ दिए पनि सन्तोषजनक नठहरिएपछि ठेक्का रद्द गर्ने निर्णय लिइएको हो।

सडक डिभिजन कार्यालयका प्रमुख सुमन योगेशका अनुसार निर्माण कार्यको भौतिक र वित्तीय प्रगति न्यून रहेको थियो। हालसम्म जम्मा २५ प्रतिशत मात्र वित्तीय प्रगति देखिएको छ। निर्माण अन्तर्गत धुलिखेल बसपार्कदेखि जिपलाइनसम्म डाँडा कटिङ कार्य सम्पन्न भएको भए पनि केही स्थानमा नाली तथा ड्रेन-वाल निर्माण गरिएको मात्र छ। जिपलाइनदेखि खावासम्मको सडक भत्काइए पनि करिब एक किलोमिटर भागमा कटिङ कार्य नै बाँकी रहेको छ। गत वर्ष जेठमा धुलिखेलतर्फबाट बेस तथा सब-बेस निर्माणको काम सुरु गरिएको भए पनि वर्षाका कारण निर्माण सामग्री बगेर सडक पुनः जीर्ण अवस्थामा पुगेको थियो।

निर्माण कार्य समयमा सम्पन्न हुन नसक्दा यात्रुहरूलाई दुई वर्षदेखि सास्ती खेप्नुपरेको छ। सडक पुनःनिर्माणका लागि भत्काइएका भागहरू समयमा मर्मत नहुँदा धेरै सवारी दुर्घटना समेत भएका छन्, जसका कारण यात्रु घाइते भएका घटनाहरू पनि रिपोर्ट भएका छन्।

धुलिखेल–खावा सडकखण्डलाई १२ मिटर फराकिलो पारेर कालोपत्रे गर्ने योजना रहेको थियो। नेपालमा पहिलो पटक यो सडकमा ग्राभेलमाथि २० सेन्टिमिटर बाक्लो सिमेन्ट मिसाइएको बेस राख्ने तथा दुई चरणको कालोपत्रे (डिबिएम र आस्फाल्ट) गर्ने योजना बनाइएको थियो। अरनिको राजमार्ग हुँदै नेपाल–चीन नाका (तातोपानी) तथा दोलखा, रामेछाप जोड्ने यो महत्वपूर्ण सडक निर्माण अवरुद्ध भएकाले यातायातमा समेत प्रभाव परेको छ।

सडक डिभिजन कार्यालयले प्रक्रिया पूरा गरी पुनः एकदेखि दुई हप्ताभित्र नयाँ ठेक्का आव्हान गरिने जनाएको छ। यसपटक भौतिक तथा वित्तीय प्रगतिको आधारमा केही परिमार्जनसहित पुनः ठेक्का खोल्ने तयारी भइरहेको कार्यालय प्रमुख योगेशले जानकारी दिएका छन्।