नवलपरासी पूर्वमा वितरक संघको औपचारिक घोषणा, व्यवसाय प्रवर्द्धनमा योगदानको अपेक्षा

नवलपरासी । नवलपरासी पूर्वमा एफएमसीजी (फास्ट-मुभिङ कन्ज्युमर गुड्स) व्यवसायमा संलग्न व्यापारीहरूको समन्वय तथा सहकार्यलाई प्रवर्द्धन गर्ने उद्देश्यसहित नवलपरासी पूर्व वितरक संघ को औपचारिक उद्घाटन सम्पन्न भएको छ।

संघको उद्घाटन कार्यक्रम २०८१ साल फागुन १० गते शनिबार सम्पन्न भएको हो। संस्थाका ज्येष्ठ सदस्य जीवन रेग्मी तथा अध्यक्ष जित ब. खनाल ले संयुक्त रूपमा पानसमा बत्ती बालेर उद्घाटन गर्नुभएको थियो।

कार्यक्रममा सदस्य सुरज रेग्मी ले स्वागत मन्तव्य व्यक्त गर्नुभएको थियो भने सदस्य महेश सिग्देल ले संघको भूमिका, उद्देश्य तथा भविष्यका योजनाहरूको विस्तृत विश्लेषण प्रस्तुत गर्नुभएको थियो।

नवलपरासी पूर्व डिलर्स संघ एफएमसीजी व्यवसायमा संलग्न व्यापारीहरूको समन्वय तथा व्यवसायिक हित संरक्षणका लागि गठन गरिएको संस्था हो। संघका सदस्य महेश सिग्देलका अनुसार, यस संस्थाले बजारमा स्वस्थ प्रतिस्पर्धा कायम राख्दै मूल्य स्थिरता तथा आपूर्ति प्रणालीलाई प्रभावकारी बनाउने लक्ष्य लिएको छ। उनले व्यवसायीहरूबीच सहकार्य अभिवृद्धि गर्दै नयाँ प्रविधि तथा रणनीतिक योजना लागू गर्नु संघको प्राथमिकता भएको उल्लेख गरे। कानुनी परामर्श, व्यापारिक तालिम तथा डिजिटल प्रविधिको प्रयोगलाई प्रवर्द्धन गर्दै व्यवसायलाई आधुनिक बनाउने योजना रहेको उनले बताए। साथै, उपभोक्ताहरूलाई गुणस्तरीय उत्पादन सहज रूपमा उपलब्ध गराउन संघले स्थानीय तथा राष्ट्रिय उत्पादकहरूसँग सहकार्य गर्ने योजना बनाएको छ। सामाजिक उत्तरदायित्व अन्तर्गत विभिन्न सेवामूलक कार्यक्रम सञ्चालन गर्दै व्यापार क्षेत्रको दीर्घकालीन विकासमा योगदान पुर्‍याउने लक्ष्य संघले राखेको सिग्देलले बताए।

संघका महासचिव पूर्णप्रसाद खरेल को सञ्चालनमा सम्पन्न उक्त कार्यक्रममा कोषाध्यक्ष सन्तोष नेपाल संयोजक रहनुभएको थियो। संघले स्थानिय डिलर्स तथा वितरकहरूको हकहित संरक्षण गर्दै व्यवसाय प्रवर्द्धनका लागि सहकार्यलाई अझ सुदृढ गर्ने अपेक्षा गरिएको छ।