पौडेलको संयोजकत्वमा बेलुन विस्फोटबारे छानबिन गर्न समिति गठन,उपप्रधानमन्त्री विष्णु पौडेल र मेयर आचार्यको अवस्था स्थिर, भेटघाटमा रोक

काठमाडौं । गृहमन्त्री रमेश लेखकले पोखरामा आयोजित ‘पोखरा भ्रमण वर्ष २०२५’ उद्घाटन समारोहमा भएको बेलुन विस्फोटको विषय छानविन गर्न आठ सदस्यीय छानविन समिति गठन गरेका छन् ।

आइतबार बिहान मन्त्रीस्तरको निर्णयबाट कास्कीका प्रमुख जिल्ला अधिकारी(सिडिओ) भरतमणि पाण्डेको संयोजकत्वमा आठ सदस्यीय छानविन समिति गठन भएको हो ।

समितिमा पोखरा महानगरपालिकाका प्रमुख प्रशासकीय अधिकृत शिवराज चौलागाई, कास्कीका प्रहरी प्रमुख प्रहरी उपरीक्षक श्यामबाबु ओलिया, सशस्त्र प्रहरीका २४ नम्बर गण हेटक्वाटरका प्रमुख सशस्त्र प्रहरी उपरीक्षक सूर्यप्रसाद तिमिल्सिना, राष्ट्रिय अनुसन्धान जिल्ला कार्यालयका उप अनुसन्धान निर्देशक सुरेश कुमार तिवारी सदस्य र कास्कीका सहायक प्रमुख जिल्ला अधिकारी गंगाबहादुर क्षेत्री सदस्य सचिव रहेका छन् । साथै समितिमा एक जना विष्फोटक पदार्थ विज्ञ समेत हुनेछन् ।

समितिले आइतबारदेखि नै बेलुन विस्फोट घटनाको के कसरी भयो ? त्यसको विस्तृत छानविन र आगामी दिनमा यसप्रकारका कार्यक्रम गर्दा पूर्वसर्तकता र अवलम्वन गर्नुपर्ने उपायसहितको प्रतिवेदन पेश गर्न १५ दिनको समय दिइएको गृह मन्त्रालयले जनाएको छ ।

शनिबार भएको सो घटनामा उपप्रधान एवं अर्थमन्त्री विष्णु पौडेल र पोखरा महानगरपालिकाका मेयर धनराज आचार्यको घाइते भएका थिए ।

शनिबार बेलुकी नै गृहमन्त्री लेखक जलनपछि कीर्तिपुर अस्पतालमा उपचाररत अर्थमन्त्री विष्णु पौडेल र पोखरा महानगरपालिकाका मेयर धनराज आचार्यको अवस्था बुझ्न अस्पताल पुगेका थिए ।

अस्पतालले आइतबार एक विज्ञप्ति जारी गर्दै दुवैको अवस्था हाल सामान्य भए पनि संक्रमणको जोखिमलाई ध्यानमा राखी अस्पतालले भेटघाट पूर्ण रूपमा बन्द गरिएको जानकारी गराएको छ।

उपचारमा प्रा.डा. वि.डी. झाडा, प्रा.डा. प्रविण गिरी नेतृत्वको सघन उपचार कक्ष टोली, प्रा.डा. शंकर मान राई, डा. विशाल कार्की, डा. मनिष यादव लगायतका जलन विशेषज्ञहरूको टोली, डा. प्रयुस अर्याल नेतृत्वको आकस्मिक उपचार टोली, नर्सिङ्ग टोलीका रिना गौचन, निर्मला कुंवर, तृष्णा महर्जन तथा अस्पतालकी मेडिकल डाइरेक्टर डा. निजीना ताम्राकार लगायतका स्वास्थ्यकर्मी संलग्न छन्।