अहिलेको सरकार ८४ को चुनावसम्म निरन्तर रहने प्रधानमन्त्री ओलीको दाबी

काठमाडौं। नेकपा एमालेका अध्यक्ष र प्रधानमन्त्री केपी शर्मा ओलीले आगामी २०८४ को चुनावपछि मात्रै सरकारको परिवर्तन हुने बताएका छन्। मंगलबार एमालेको संसदीय दलको बैठकलाई सम्बोधन गर्दै उनले सरकारले ढल्ने भन्ने भ्रमको विरोध गर्दै अहिलेको सरकार ०८४ को चुनावसम्म निरन्तर रहने दाबी गरे।

प्रधानमन्त्री ओलीले भने, “दिनहुँ सरकार ढल्ने कुरा आउँछ, बेलुका, साँझ वा राति ढल्छ भन्ने भनाइहरु छन्। तर ०८४ को निर्वाचनपछि मात्रै सरकारको भविष्यको कुरा थाहा हुनेछ। मंसिरको चुनावअघि सरकार ढल्ने कुरा भन्नु असत्य हो।”

यसका साथै, ओलीले आफ्नी श्रीमतीको नाममा स्वीस बैंकमा ठूलो रकम राखिएको भन्ने आरोपलाई झुटो र निराधार भन्दै विरोध जनाए। उनले भने, “मैले टिकटकमा देखे, एउटा व्यक्तिले भनिरहेको थियो कि मैले श्रीमतीको नाममा ४१ करोड रुपैयाँ स्वीस बैंकमा जम्मा गरेको छु। यस्तो आरोपमा मलाई नै अचम्म लाग्छ।”

त्यस्तै, प्रधानमन्त्री ओलीले सरकारले ल्याएका अध्यादेशमार्फत बन्ने कानुन देशको विकासमा योगदान पुर्‍याउने विश्वास व्यक्त गरे। उनले भने, “युवाहरूलाई पनि अब देशभित्र बसेर केही गर्ने अवसर पाउनेछन् र त्यसका लागि उनीहरू खुसी भएका छन्।”