६ महिनासम्म शिशुलाई मात्र स्तनपान गराउन मन्त्रालयको आग्रह,आमाको दूधलाई प्रतिस्थापन गर्ने वस्तुको बजारीकरण नियन्त्रणमा प्रतिबद्धता

काठमाण्डौ। नेपाल सरकारको स्वास्थ्य तथा जनसंख्या मन्त्रालयले नवजात शिशुलाई जन्मेको पहिलो एक घण्टाभित्र खुवाउनुपर्ने आमाको बिगौती दूधले बालबालिकालाई दीर्घकालीन रोगहरूको जोखिमबाट टाढा राख्न सहयोग पुग्ने जनाएको छ। मन्त्रालयले बाल मृत्युदर घटाउन र आमाको स्वास्थ्यमा सकारात्मक प्रभाव पार्न स्तनपानलाई प्राथमिकतामा राख्न आवश्यक रहेको उल्लेख गरेको छ।

विज्ञका अनुसार, आमाको दूधमा शिशुका लागि आवश्यक सम्पूर्ण पोषक तत्व हुने भएकाले जन्मेपछि ६ महिनासम्म मात्र स्तनपान गराउनुपर्छ। त्यसपछि पोषिलो थप खाना सुरु गरी कम्तीमा दुई वर्षसम्म स्तनपानलाई निरन्तरता दिनुपर्ने मन्त्रालयको सुझाव छ।

मातृ-शिशु मैत्री अभियानअन्तर्गत मन्त्रालयले स्तनपानको संरक्षण, प्रवर्धन र सहयोग गर्ने तथा आमाको दूधलाई प्रतिस्थापन गर्ने वस्तुहरूको अनुचित बजारीकरणलाई नियन्त्रण गर्ने कार्यमा जोड दिएको छ। मन्त्रालयले आमाको दूध प्रतिस्थापन गर्ने वस्तु (बिक्री वितरण नियन्त्रण) ऐन, २०४९ र नियमावली, २०५१ का प्रावधानहरू कार्यान्वयनमा प्रतिबद्धता जनाउँदै सबै सरोकारवालालाई ऐन प्रभावकारी बनाउन आग्रह गरेको छ।

स्वास्थ्य मन्त्रालयले सरोकारवालाहरुलाई उक्त ऐन र नियमावलीका दफाहरूका बारेमा जानकारी गराउन विभिन्न कार्यक्रमहरू सञ्चालन गरिरहेको छ। मन्त्रालयले ऐन कार्यान्वयनका लागि सहकार्य गर्न सम्बन्धित पक्षलाई आग्रह गरेको छ।