गणतन्त्रलाई सुदृढ र प्रभावकारी बनाउन सबै नेपालीलाई एक सूत्रमा बाँध्न अनिवार्य छ: शेरबहादुर देउवा

काठमाडौँ ,१६ पुस । नेपाली कांग्रेसका सभापति एवम् पूर्वप्रधानमन्त्री शेरबहादुर देउवाले गणतन्त्रलाई अझ विश्वसनीय र सुदृढ बनाउनु आजको आवश्यकता भएको बताएका छन् । मङ्गलबार काठमाडौंमा आयोजित राष्ट्रिय मेलमिलाप दिवस र सय दिने विशेष अभियानको समापन कार्यक्रममा सम्बोधन गर्दै उनले गणतन्त्रलाई सफल र स्थायी बनाउन सबैको कर्तव्य रहेको बताए।

देउवाले राष्ट्रिय मेलमिलापको नीतिबाट नेपाली जनतालाई एकताबद्ध गर्दै अघि बढ्नुपर्ने आवश्यकता रहेको बताए। उनका अनुसार, अहिलेको गणतन्त्रलाई अझ प्रभावकारी बनाउन आवश्यक छ र यसको स्थायित्व सुनिश्चित गर्न सबै नेपालीलाई एक सूत्रमा बाँध्न अनिवार्य छ।

सभापति देउवाले मधेश, पहाड र हिमालका सम्पूर्ण नेपालीबीच एकता र मेलमिलापको कुरा गर्दै, सबै क्षेत्रका इच्छाहरुको समन्वय गरेर एकताबद्ध भएर अघि बढ्नुपर्ने आवश्यकता औंल्याउनुभयो। उहाँले थप्नुभयो, ‘‘कांग्रेसका लागि मात्रै होइन, सम्पूर्ण नेपालीका लागि राष्ट्रिय मेलमिलाप अत्यावश्यक छ।’’

उनले सम्पूर्ण नेपालीलाई राष्ट्रिय एकताको सूत्रमा बाँधेर गणतन्त्रलाई सुदृढ र प्रभावकारी बनाउन आह्वान समेत गरे ।