मुख्य सडक पुनः सञ्चालन, केही अझै अवरुद्ध, हेटौँडा–भैसे, सिमभन्याङ–पालुङ–नौबिसे, हेटौँडा–सिन्धुली–धरान चतरा सडक खुल्यो

बागमती । वर्षासँगै खसेको पहिरोका कारण अवरुद्ध भएका मकवानपुरका हेटौँडा–काठमाडौँ र हेटौँडा–धरान चतरा जोड्ने तीनवटा मुख्य सडक पुनः सञ्चालनमा आएका छन्। जिल्ला प्रहरी कार्यालयका अनुसार, पहिरो पन्छाएपछि हेटौँडा–भैसे, सिमभन्याङ–पालुङ–नौबिसे जोड्ने त्रिभुवन लोकपथ, र हेटौँडा–सिन्धुली–धरान चतरा जोड्ने मदन भण्डारी लोकमार्ग आज बिहानदेखि सञ्चालनमा आएको छ।

यसअघि, त्रिभुवन लोकपथअन्तर्गत हेटौँडा–भैसे–चित्लाङ–चन्द्रागिरि–काठमाडौँ जाने सडक आइतबार साँझबाट एकतर्फी रूपमा सञ्चालनमा आएको थियो। जिल्ला प्रहरी कार्यालयका निमित्त प्रवक्ता प्रहरी निरीक्षक ठाकुरप्रसाद सापकोटाले पहिरो पन्छाएपछि सडक पुनः खुल्न सकेको जानकारी दिएका छन्।

तर, कान्तिलोकपथका केही भाग भने अझै अवरुद्ध छन्। बकैया गाउँपालिका–१२ घट्टेपाखा, ११ नम्बर वडाको लाम्राङ र आँपचौरमा पहिरोका कारण सडक पूर्ण रूपमा बन्द छ। भिमफेदी गाउँपालिका–८ स्थित वाग्मती खोलाको पुल कटान भएपछि पनि सडक अवरुद्ध छ।

त्यस्तै, दक्षिणकाली–छैमले–सिस्नेरी सडकखण्डअन्तर्गत इन्द्रसरोवर गाउँपालिका–३ रामचन्द्र भञ्याङमा पहिरोका कारण कुलेखानी–फाखेल–फर्पिङ सडक पूर्ण रूपमा बन्द छ। इन्द्रसरोवर गाउँपालिका–२ सिमखोलामा आएको बाढीले पनि कुलेखानी–सिस्नेरी–फर्पिङ सडकखण्ड अवरुद्ध भएको प्रहरीले जनाएको छ।

सापकोटाका अनुसार, कुलेखानी–मार्खु भित्री सडकखण्डअन्तर्गत थानकोट–कुलेखानी सडक पनि सिम्लाङमा खसेको पहिरोका कारण पूर्ण रूपमा अवरुद्ध छ। भीमफेदी गाउँपालिका–४ रातोमाटे र भीमफेदी–६ ढोकाफेदीमा खसेको पहिरोले हेटौँडा–कुलेखानी जोड्ने बाटोसमेत बन्द रहेको छ। अन्य अवरुद्ध सडकमा पहिरो पन्छाउने काम जारी रहेको उनले बताए।