सहकारी बचत रकम दुरुपयोग छानबिनको प्रतिवेदन संसद्मा, कार्यान्वयनका लागि सभामुखको निर्देशन

काठमाडौं: सहकारी संस्थाको बचत रकम दुरुपयोगबारे छानबिन गर्न बनेको संसदीय विशेष समितिले प्रतिनिधि सभामा प्रतिवेदन पेस गरेको छ। समितिका सभापति सूर्य थापाले प्रतिनिधि सभा बैठकमा प्रस्तुत गरेको प्रतिवेदनमा साढे तीन महिनामा ४५१ जनासँग छलफल र सोधपुछ गरिएको जानकारी दिएका छन्।

थापाले समितिको ५६ बैठक भएको र सोही आधारमा प्रतिवेदन तयार गरिएको बताए। समितिले १४ वटा बैठकमा सहकारी बचत रकमको दुरुपयोगमा आरोपित ४७ सहकारी संचालक, रवि लामिछानेसहित गोर्खा मिडियाका सञ्चालक र कर्मचारीसमेत ५५ जनासँग सोधपुछ गरेको छ।

समितिले ४० सहकारी संस्थाको वित्तीय विश्लेषणसहितको प्रतिवेदन तयार पारेको छ। थापाले प्रतिवेदन पेस गर्दै सहकारी ठगीमा विवाह, अंशबन्डा, ऋणी र सेयर सदस्यसमेत नक्कली रहेको पाइएको उल्लेख गरे। ‘सहकारी क्षेत्रले नक्कलीको बिगबिगी खेपिरहेको छ। सहकारी रकम दुरुपयोग गर्न विवाह, अंशबन्डा, पुनर्विवाह पनि नक्कली गरिएको देखियो। साधारणसभा र प्रतिवेदन पनि फेक छन्,’ थापाले भने।

थापाले प्रतिनिधि सभामा पेस गरेको प्रतिवेदनलाई सभामुख देवराज घिमिरेले कार्यान्वयनका लागि नेपाल सरकारलाई पठाउन संघीय संसद् सचिवालयलाई निर्देशन दिएका छन्।