भगाइसकेको मान्छेलाई खोज्न समय लाग्ने भएकोले हरकोसिस भइरहेको छ: रवि लामिछाने

काठमाडौं, वैशाख २९  । गृह तथा उपप्रधानमन्त्री रवि लामिछानेले सरकारी ठगीमा मुछिएका जीबी राईलाई यसअघिको सरकारले भगाएको आरोप लगाएका छन् । पत्रकारको  प्रश्नमा उनले भने, ‘भाग्दाखेरी सरकारमा को थियो  ? ’ आज बिहान चितवनमा पत्रकारसँग कुरा गर्दै गृहमन्त्री लामिछानेले  यस्तो   प्रतिक्रिया दिएका हुन् । उनले भगाइसकेको मान्छेलाई खोज्न समय लाग्ने भएकोले हरकोसिस भइरहेको बताए ।लामिछानेलाई पत्रकारहरूले जिबी राईबारे सोधेको प्रश्नमा जवाफ दिँदै किन समात्न सकिएन भन्नेसँगै किन भगाइएको भन्ने प्रश्न पनि आउने बताएका हुन्।

उनले भने , ‘समस्या आउँदा आउँदै भगाएको चाहीँ किन भन्ने प्रश्न पनि आउँछ। भगाइसकेको मान्छेलाई समय लाग्ने भएकाले हर कोशिस भइरहेको छ। भाग्दाखेरी को थियो सरकारमा खोज्नुस्,’ । गृहमन्त्री लामिछानेले जीबी राईका सन्दर्भमा केही प्रक्रिया पूरा गर्नुपर्ने बाध्यता भएकोले समय लागेको पनि बताए ।

उनले भने, ‘समात्दै छु कोशिस भइरहेको छ । त्यसका लागि गृह मन्त्रीको आदेशका काम भएको छ । त्यसका अन्य प्रक्रियाका काम आइरहेका छन् । कतिपय प्रक्रियाका कुराहरू ठ्याक्कै सार्वजनिक गर्न सकिँदैन ।’