काठमाडौं । माछापुच्छ्रे बैंक लिमिटेडले व्यक्तिगत तथा व्यावसायिक ग्राहकलाई लक्षित गर्दै ‘एमबीएल अटो लोन’ योजना सञ्चालनमा ल्याएको छ। नयाँ वा प्रयोग भइसकेका सवारीसाधन खरिद गर्न चाहने ग्राहकलाई सहज वित्तीय पहुँच उपलब्ध गराउने उद्देश्यले बैंकले उक्त कर्जा सुविधा उपलब्ध गरेको हो।
बैंकका अनुसार अटो लोनअन्तर्गत न्यूनतम ५ लाख रुपैयाँदेखि अधिकतम १ करोड ५० लाख रुपैयाँसम्म कर्जा उपलब्ध हुनेछ। यो सुविधा व्यक्तिगत प्रयोगका लागि नयाँ वा पुराना सवारीसाधन खरिद गर्न चाहने नेपाली नागरिक तथा नेपालमा दर्ता भएका व्यावसायिक संस्थाले लिन सक्नेछन्।
योजनाअनुसार कर्जाको अधिकतम भुक्तानी अवधि ८ वर्षसम्म रहनेछ। बैंकले ऋणीको आम्दानी तथा भुक्तानी क्षमताका आधारमा लचकदार पुनर्भुक्तानी संरचना उपलब्ध गराउने जनाएको छ। व्यक्तिगत ग्राहकका साथै व्यवसायिक प्रतिष्ठानले समेत यो सुविधा उपयोग गर्न सक्ने व्यवस्था छ।
कर्जा आवेदनका लागि व्यक्तिगत आवेदकको न्यूनतम उमेर २१ वर्ष हुनुपर्नेछ। साथै ऋण भुक्तानी अवधि ऋणीको ७० वर्ष उमेर वा अवकाश उमेरमध्ये जुन पहिले हुन्छ, त्यसभन्दा अगाडि सम्पन्न हुनुपर्ने व्यवस्था छ। अविभाजित परिवारका सदस्यबीच संयुक्त रूपमा पनि कर्जा आवेदन दिन सकिने बैंकले जनाएको छ।
व्यावसायिक संस्थाका हकमा भने सम्बन्धित निकायमा दर्ता भएको प्रमाणपत्र तथा प्यान वा भ्याट दर्तासम्बन्धी कागजात अनिवार्य रूपमा पेश गर्नुपर्नेछ। बैंकका अनुसार सवारीसाधन स्वामित्वलाई सहज र पहुँचयोग्य बनाउन यो कर्जा योजना प्रभावकारी हुने छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
