नेकपा एसले जम्कट्टेललाई विश्वासको मत दिने , आलोपालो मुख्यमन्त्री बन्ने सहमति

काठमाडौँ  , १९ चैत | बागमतीका मुख्यमन्त्री शालिकराम जम्कट्टेललाई नेकपा एकीकृत समाजवादीले विश्वासको मत दिने भएको छ । बागमतीमा माओवादी केन्द्र संसदीय दल नेता जम्कट्टेललाई सोमबार एकीकृत समाजवादीले विश्वासको मत दिने भएको छ। बागमती प्रदेशमा आलोपालो मुख्यमन्त्री बन्ने सहमति पनि भएको छ। सरकारमा आलोपालोको शर्त राखेको एकीकृत समाजवादीले सोमबार केन्द्रमा सहमति भएपछि विश्वासको मत दिने निर्णय गरेको हो ।

नेपाली कांग्रेसले आफ्ना मन्त्रीलाई फिर्ता बोलाएर सरकारलाई दिएको समर्थन फिर्ता लिएपछि आज मुख्यमन्त्री जम्कट्टेलले विश्वासको मत लिँदैछन् ।मुख्यमन्त्री जम्कट्टेलले प्रदेश सभा बैठकबाट विश्वासको मत लिने प्रयोजनका लागि सोमबार दिउँसो १ः०० बजे प्रदेश सभाको बैठक बोलाइएको थियो ।

नेपाली कांग्रेस सरकारबाट बाहिरिँदै समर्थन फिर्ता लिएपछि संवैधानिक व्यवस्थाअनुसार मुख्यमन्त्रीको विश्वासको मत लिने प्रक्रिया अघि बढाइएको हो । आज जम्कट्टेलले तेस्रोपटक विश्वासको मत लिन लागेका हुन् । सरकारमा सहभागी दलले समर्थन फिर्ता लिएमा ३० दिनभित्र विश्वासको मत लिनुपर्ने संवैधानिक प्रावधान रहेको छ ।