बुद्धिजीवी र अनुभव भएका व्यक्तिसँग बसेर राष्ट्र निर्माणको खाका तयार गर्नुपर्छ : माधवकुमार नेपाल

काठमाडौँ, फागुन ८ | एकीकृत समाजवादीका अध्यक्ष पूर्वप्रधानमन्त्री माधवकुमार नेपालले  देश बनाउने खाका तयार गर्नुपर्ने बताएका छन् । सोमबार जनकपुरधाममासमाजवादी इन्जिनियरिङ एसोसिएसन नेपाल मधेशले आयोजना गरेको कार्यक्रममा बोल्दै उनले यस्तो बताएका हुन् ।

उनले प्रधानमन्त्री दाहाल र नेकपा एमाले अध्यक्ष केपी शर्मा ओलीलाई देश विकासका लागि खाका बनाएर अघि बढ्न आग्रह गरे । उनले सबै बुद्धिजीवि, अनुभव प्राप्त व्यक्तिहरुसँग बसेर देश निर्माणको खाका तयार गर्नुपर्ने आवश्यकता रहेको बताए ।

उनले भने , मैले हिजो केपी ओलीजीलाई पनि भनेको थिएँ, म प्रधानमन्त्री हुँदा पनि मैले सोचेको थिएँ । प्रचण्डजीलाई पनि पटकपटक भन्ने गरेको छु । हामी बसौँ । अनुभव भएकाहरु बसौँ । अनुभव भएका व्यक्ति, नेता, मन्त्रीहरु । विज्ञहरु सबै बसौँ । यो देश कसरी बनाउने, कसरी अघि बढाउने भन्नेबारेमा छलफल गरौँ । देश विकासको मार्गचित्र बनाऔँ हामी ।’