स्याङ्जामा भण्डारण गरिएको सुन्तला कुहियो

काठमाडौँ,  माघ   १२ ।स्याङ्जामा शीतभण्डारमा भण्डारण गरिएको सुन्तला कुहिएपछि किसान चिन्तित छन्। स्याङ्जा शीतभण्डार सहकारीले सञ्चालनमा ल्याएको शीतभण्डारमा भण्डारण गरिएको केही सुन्तला कुहिएको हो।

किसानले बढी आम्दाी गर्ने उद्देश्यका साथ सुन्तला शीतभण्डारमा भण्डारण गरेका थिए। तर, उल्टै कुहिएपछि घाटा हुने भन्दै उनीहरू चिन्तित भएका हुन्। पुतलीबजारका रामबन्धु अर्यालले शीतभण्डारमा ५० क्यारेट सुन्तला भण्डारण गरेका थिए। केही दिनअघि हेर्दा छ/सात क्यारेट जति सुन्तला कुहिएको उनले बताए।

अब उनी चाँडै सुन्तला बेच्ने तयारीमा छन्। अहिले बोटबाटै प्रतिकिलो ८५ देखि ९० रुपैयाँसम्ममा बिक्री भइरहेको छ। ‘कुहिन थालेपछि शीतभण्डारमा राखिएको सुन्तला प्रतिकिलो ५० देखि  ६० रुपैयाँ सम्ममा बिक्री गर्नुपर्ने बाध्यता छ’, उनले भने।

पुतलीबजार करेन्डाँडाका कृष्णजङ केसीले भण्डारण गर्दाको बेला आठ लाख रुपैयाँ मूल्य पर्ने दुई सय ६६ क्यारेट सुन्तला भण्डारण गरे। सुन्तला कुहिएको पाएपछि उनले सस्तैमा सुन्तला बेच्न थालेका छन्। ‘मूल्य बढी पाइने आहले भण्डारण गरे, उल्टै घाटा लाग्ने अवस्था आयो’, केसीले भने। उनले भण्डारण गरेका सुन्तलाका क्यारेटबाट कुहिएका निकालेर राम्रा सुन्तला प्रतिकिलो ६५ रुपैयाँका दरले बेचे।

‘मापदण्ड अनुसार नै सुन्तला भण्डारण गरियो’ उनले भने, ‘यस्तो प्राविधिक विषयमा व्यवस्थापन पक्षको लापर्बाहीले धेरै किसानले नोक्सानी बेहोर्नुपरेको छ।’बर्सेनि एक लाख ५० हजार रुपैयाँसम्मको सुन्तला बिक्री गरेर त्यसकै भरमा घरखर्च चलाउने किसान बढी मर्कामा परेको उनी बताउँछन्। यसको सही व्यवस्थापन हुन नसकेमा आगामी दिनमा किसानले यहाँ सुन्तला, आलु लगायतका कृषिउपज भण्डारण नगर्ने र राज्यको ठूलो लगानी खेर जानसक्ने भएकाले सम्बन्धित निकायले बेलैमा चासो दिनुपर्ने उनको जोड छ।

किसानले बढी मूल्य पाउने आशामा भण्डारण गरेको सुन्तला कुहिंदा घाटा खेप्नुपर्ने बाध्यता तथा पेशाबाट नै पलायन हुने चिन्ता छ। गत वर्ष सुन्तला तथा आलुको भण्डारण राम्रो भए पनि यसपटक के कारणले सुन्तलामा खराबी आयो भन्नेबारे अध्ययन भइरहेको शीतभण्डारका अध्यक्ष अनन्तकुमार श्रेष्ठले बताए।

‘भण्डारण गरिएकामध्ये १० देखि १५ प्रतिशतसम्म सुन्तलामा खराबी देखिन सक्ने भएकाले सचेत थियौं’, उनले भने, ‘अनुमानभन्दा औसतमा बढी सुन्तला खराब भएको पाइयो।’

स्याङ्जामा प्रधानमन्त्री कृषि आधुनिकीकरण परियोजनाअन्तर्गत सुन्तला सुपरजोन सञ्चालनमा छ। जिल्लाका विभिन्न ठाउँमा उत्पादन भएका सुन्तला यहाँ भण्डारण गरिएको थियो। भण्डारण गरिएको सुन्तलामा खराबी देखिएपछि सुन्तला सुपरजोन, कृषि ज्ञान केन्द्र स्याङ्जा, रामपुर कृषि क्याम्पस लगायतका कार्यालयबाट प्राविधिक आएर निरीक्षण तथा अध्ययन गरिरहेको अध्यक्ष श्रेष्ठले बताए।

हाल एक हजार तीन सय टन क्षमताको शीतभण्डार सञ्चालनमा छ। सोही ठाउँमा एक हजार दुई सय टन क्षमताको अर्को शीतभण्डार निर्माणको क्रममा छ।‘जिल्लाका सुन्तला उत्पादक किसानले ल्याएको छ हजार ४३ क्यारेट सुन्तला भण्डारण गरिएको थियो’, श्रेष्ठले भने, ‘भण्डारण गरिएको सुन्तलामा खराबी देखिएपछि बिग्रेका सुन्तला नष्ट गरी राम्रो सुन्तला शीतभण्डार तथा किसान स्वयंले बेचिरहेको छ।’

यसपटक सुन्तलाको उत्पादन धेरै भएकाले किसानले धेरै सुन्तला भण्डारण गर्न ल्याएको सुन्तला सुपरजोन कार्यक्रमका प्रमुख माधव लम्सालले बताए। शीतभण्डारमा भण्डारण गरिएको सुन्तला केही मात्रामा कुहिएपछि धेरै भण्डारण गर्ने किसानलाई बढी मर्का परेको छ। रासस