रुकुमपश्चिमका ठूलीभेरी र सानीभेरी नदीमा जलसतह बढ्दो, सतर्कता अपनाउन आग्रह

काठमाडौं, साउन १८। रुकुमपश्चिम हुँदै बग्ने ठूलीभेरी र सानीभेरी नदीमा लगातारको वर्षाका कारण पानीको सतह बढ्दै गएको छ। ठूलीभेरी नदीले गएराति खतरा तह पार गरिसकेको थियो भने आइतबार बिहान सतह केही घटेर ५।३५ मिटरमा पुगेको छ। यस्तै, सानीभेरी नदीको सतह पनि शनिबार २।८ मिटरबाट आइतबार बिहान ३।८ मिटर पुगेको छ।

जल तथा मौसम विज्ञान विभागका अनुसार वर्षा जारी रहेकाले दुवै नदीको सतह फेरि बढ्ने सम्भावना छ। नदी किनारका बासिन्दालाई सावधानी अपनाउन आग्रह गरिएको छ। कमजोर र भिरालो जमिनमा पहिरोको खतरा पनि रहेको बताइएको छ।

रुकुमपश्चिमका प्रमुख जिल्ला अधिकारी कुलबहादुर जिसीले नदी आसपास र डुबान सम्भावित स्थानहरूमा सतर्कता अपनाउन अनुरोध गर्नुभएको छ। साथै, जोखिमपूर्ण घटनाहरू भएमा तत्काल नजिकको प्रहरी कार्यालय, जनप्रतिनिधि वा विपद् व्यवस्थापन समितिलाई जानकारी दिन पनि उनले आग्रह गरेको छ। अहिले देशभर मनसुन सक्रिय रहेकाले पूर्व सूचना र चेतावनीलाई गम्भीर रूपमा लिन भनिएको छ।