नयाँ सार्वजनिक सवारीको दर्ता बन्द

काठमाडौँ । सरकारले वायु प्रदूषण, ट्राफिक जाम र बढ्दो सवारी चाप नियन्त्रण गर्न सार्वजनिक सवारी साधनको नयाँ दर्ता तत्कालका लागि बन्द गरेको छ । यातायात व्यवस्था विभागले जारी गरेको सूचनामा सार्वजनिक यातायातको उचित व्यवस्थापन हुन नसक्दा सडकमा अत्यधिक सवारी बढेको र त्यसले प्रदूषण तथा आवागमनमा समस्या सिर्जना गरेको उल्लेख छ ।

सरकारले “सवारी तथा यातायात व्यवस्था ऐन, २०४९” अनुसार सार्वजनिक हितलाई ध्यानमा राख्दै यो निर्णय गरेको जनाएको छ । यो रोक सबै प्रकारका सार्वजनिक सवारी साधनमा लागू हुनेछ, जसमा इलेक्ट्रिक सवारी पनि समावेश छन् । विभागले निर्णय तुरुन्त लागू गर्न सबै प्रदेश र स्थानीय यातायात कार्यालयलाई निर्देशन दिएको छ । तर दर्ता रोक्का कति समयसम्म रहने भन्नेबारे सरकारले कुनै जानकारी दिएको छैन ।