काठमाडौँ, २० असार । प्रधानमन्त्री पुष्पकमल दाहालको एक अभिव्यक्तिलाई लिएर प्रमुख प्रतिपक्षी नेकपा एमालेले आपत्ति जनाएको छ। प्रधानमन्त्री दाहालले सोमबार भारतको जम्मुबाट नेपाल आई व्यवसाय थालेका सरदार प्रीतम सिंहको पुस्तक विमोचन कार्यक्रममा बोल्दै आफूलाई प्रधानमन्त्री बनाउन सरदार प्रीतम सिंह पटक–पटक दिल्ली गएको भनी दिएको अभिव्यक्तिप्रति एमालेले आपत्ति जनाएको हो ।
प्रधानमन्त्री दाहालको उक्त अभिव्यक्ति देशको सार्वभौमिकताविरूद्ध भएको र यसले संसदको मानमर्दन गरेको भन्दै यसबारे एमालेले टिप्पणी गरेकाे छ ।
यसबारे विस्तृत छलफल गर्न एमालेले आफ्नो संसदीय दलको बैठक समेत बोलाएको छ। आज दुबै सदनको बैठक बस्दै छ। प्रतिनिधि सभाको बैठक आज दिउँसो ३ बजे बस्नेछ भने राष्ट्रिय सभाको बैठक साढे २ बजे बस्नेछ। त्यसअघि एमालेले आफ्नो संसदीय दलको बैठक दिउँसो १ बजेलाई बोलाएको हो। बैठक संघीय संसद् भवनको ल्होत्से हलमा बोलाइएको छ ।
नेकपा एमालेले आज बस्ने प्रतिनिधिसभा र राष्ट्रिय सभाको बैठकमा यो विषय जवाफ माग्ने तयारी गरेको बताइएको छ।
प्रधानमन्त्रीको अभिव्यक्ति घातक भएको र नेपालको संविधान, मुलुकको सार्वभौमतामाथि अपमान भएको एमालेको भनाई छ ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
