आजदेखि निर्वाचन सुरक्षाका लागि नेपाली सेना परिचालन

काठमाडौँ । २१ फागुनमा हुने प्रतिनिधिसभा निर्वाचनलाई शान्तिपूर्ण र सुरक्षित बनाउन आज ( बुधबार) देखि नेपाली सेना देशभर परिचालित भएको छ। निर्वाचन स्वच्छ, स्वतन्त्र र भयरहित बनाउन एकीकृत सुरक्षा योजना २०८२ अनुसार सेना खटाइएको हो।

यस योजनाअनुसार निर्वाचन सुरक्षामा नेपाली सेना, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग र निर्वाचनका लागि भर्ना गरिएका निर्वाचन प्रहरी परिचालित हुनेछन्। मतदानस्थलको भित्री सुरक्षा नेपाल प्रहरी र निर्वाचन प्रहरीले गर्नेछन् भने दोस्रो घेराको जिम्मा सशस्त्र प्रहरीले लिनेछ। नेपाली सेना भने बाहिरी घेरामा रही सुरक्षा सम्हाल्नेछ।

सेनाका अनुसार १६५ वटै निर्वाचन क्षेत्रमा ७९ हजार ७२७ सैनिक परिचालन गरिएको छ। निर्वाचनअघि मतपत्र छपाइ र ढुवानीदेखि मतदान, मतगणना र महत्त्वपूर्ण संरचनाको सुरक्षासम्म सेनाले भूमिका खेल्नेछ। यस निर्वाचनमा ३ हजार ४०६ उम्मेदवार प्रतिस्पर्धामा छन्।