शहीद दिवस :शहीदको नाम, नेताको काम : स्वार्थकै राजनीति!

काठमाडौँ। देश र जनताका लागि जीवन आहुति दिने शहीदहरूको सम्मानमा आज माघ १६ गते देशभर विभिन्न कार्यक्रमसहित शहीद दिवस मनाइँदैछ। इतिहासका विभिन्न कालखण्डमा प्रजातन्त्र, राष्ट्रिय स्वाधीनता र जनअधिकारका लागि भएका आन्दोलनमा शहादत प्राप्त गरेका वीर सपुतहरूको सम्झनामा साताव्यापी कार्यक्रम आयोजना गर्ने परम्परा रहेको छ। साताव्यापी कार्यक्रमको अन्तिम दिन आज शहीद उद्यान लैनचौरमा विशेष श्रद्धाञ्जली सभा आयोजना गरिँदैछ।

शहीद दिवसका अवसरमा बिहान शान्तिवाटिकामा भेला भएर नेपाल प्रहरी र सशस्त्र प्रहरीको ब्यान्ड, मार्चपास टोली तथा शहीदका तस्बिरसहितको बग्गी सहभागी प्रभातफेरी शहीद उद्यान लैनचौर पुगेर श्रद्धाञ्जली सभामा परिणत हुनेछ। कार्यक्रममा प्रधानमन्त्री, मन्त्री, सरकारका उच्चपदस्थ अधिकारी, जनप्रतिनिधि तथा सुरक्षा निकायका प्रमुखहरूको सहभागिता रहने जनाइएको छ।

सरकारले शहीद दिवसको अवसरमा सार्वजनिक बिदा दिएको छ। विगतमा केन्द्र सरकारले कटौती गरेको सार्वजनिक बिदा २०८१ सालदेखि पुनः लागू गर्ने निर्णय २०८० सालमै भइसकेको थियो। विसं १९९७ मा निरंकुश राणा शासनविरुद्ध आन्दोलनका क्रममा शुक्रराज शास्त्री, धर्मभक्त माथेमा, दशरथ चन्द र गंगालाल श्रेष्ठले शहादत प्राप्त गरेका थिए। नेपालको पहिलो शहीदका रूपमा लखन थापालाई मानिन्छ। विसं २०१२ देखि तत्कालीन काठमाडौँ नगरपालिकाको संयोजकत्वमा माघ १६ गतेलाई शहीद दिवसका रूपमा मनाउन थालिएको हो।

यसैबीच, वर्तमान अन्तरिम चुनावी सरकारले प्रत्येक वर्ष भदौ २३ गते ‘जेनजी शहीद दिवस’ मनाउने निर्णय गरेको छ। भ्रष्टाचार र अव्यवस्थाविरुद्ध नवयुवा पुस्ताले सुरु गरेको आन्दोलनका क्रममा ७६ जनाको ज्यान गएको घटनापछि पूर्वप्रधानन्यायाधीश सुशीला कार्की नेतृत्वको चुनावी सरकारको निर्णयअनुसार उक्त दिवस घोषणा गरिएको हो। यद्यपि पछिल्लो समय झैझगडा वा दुर्घटनामा ज्यान गुमाएकालाई समेत शहीद घोषणा गर्ने दबाब बढ्दा वास्तविक शहीदको गरिमा कमजोर हुँदै गएको भन्ने गुनासो जनस्तरबाट उठ्दै आएको छ। शहीद दिवसमा हरेक वर्ष प्रतिबद्धता दोहोरिए पनि शहीदको सपना पूर्ण रूपमा साकार हुन नसकेको टिप्पणी पनि निरन्तर सुनिँदै आएको छ।