काठमाडौँ। प्रधानन्यायाधीश पदका लागि सिफारिस भएका न्यायाधीशहरूमध्ये डा. मनोजकुमार शर्माले सबैभन्दा बढी मुद्दा तथा निवेदन फछ्र्यौट गरेको तथ्य सार्वजनिक भएको थियो। सर्वोच्च अदालतले तयार पारेको ‘न्यायपालिकाको चौथो पञ्चवर्षीय रणनीतिक योजना मूल्यांकन प्रतिवेदन’अनुसार २०७६ साउनदेखि २०८१ असार मसान्तसम्मको अवधिमा शर्माले सात हजार ३ सय ८८ वटा मुद्दा तथा निवेदन किनारा लगाएका थिए।
प्रतिवेदनअनुसार शर्मापछि सबैभन्दा बढी मुद्दा फछ्र्यौट गर्ने न्यायाधीश हरिप्रसाद फुयाल रहेका थिए। उनले उक्त अवधिमा ६ हजार ५ सय २६ मुद्दा फछ्र्यौट गरेका थिए। त्यस्तै कुमार रेग्मीले ६ हजार २ सय २६, तिलप्रसाद श्रेष्ठले ५ हजार ९ सय ९२, नहकुल सुवेदीले ४ हजार ९ सय ६९ तथा कायममुकायम प्रधानन्यायाधीश सपना प्रधान मल्लले ४ हजार ६ सय ७१ मुद्दा फछ्र्यौट गरेकी थिइन्।
संवैधानिक परिषद्को बैठकले प्रधानन्यायाधीश नियुक्तिका लागि प्रस्तावित ६ न्यायाधीशमध्ये सबैभन्दा बढी मुद्दा किनारा लगाउने डा. शर्मालाई प्रधानन्यायाधीश पदमा सिफारिस गरेको थियो। प्रतिवेदनअनुसार शर्माले आर्थिक वर्ष २०८०/८१ मा मात्रै २ हजार १ सय ८१ मुद्दा फछ्र्यौट गरेका थिए। उनले आर्थिक वर्ष २०७६/७७ मा १ हजार ६ सय ४६, २०७७/७८ मा ५ सय ९४, २०७८/७९ मा १ हजार १० तथा २०७९/८० मा १ हजार ९ सय ५७ मुद्दा किनारा लगाएका थिए।
प्रतिवेदनमा पछिल्ला दुई आर्थिक वर्षमा न्यायाधीशहरूको मुद्दा फछ्र्यौट दर उल्लेख्य रूपमा बढेको देखिएको थियो। आर्थिक वर्ष २०७९/८० मा तिलप्रसाद श्रेष्ठले सबैभन्दा बढी २ हजार ४ सय ८१ मुद्दा किनारा लगाएका थिए भने २०८०/८१ मा उनले २ हजार ७ सय ४६ मुद्दा फछ्र्यौट गर्दै एकै वर्ष सबैभन्दा धेरै मुद्दा किनारा लगाउने न्यायाधीश बनेका थिए।
त्यस्तै आर्थिक वर्ष २०८०/८१ मा नहकुल सुवेदीले २ हजार ३ सय ७९, हरिप्रसाद फुयालले २ हजार २ सय ३२, डा. शर्माले २ हजार १ सय ८१ तथा कुमार रेग्मीले १ हजार ८ सय ६६ मुद्दा फछ्र्यौट गरेका थिए। सोही अवधिमा सपना प्रधान मल्लले १ हजार ४ सय ७१ मुद्दा किनारा लगाएकी थिइन्।
सर्वोच्च अदालतले न्यायपालिकाको कार्यसम्पादनलाई पारदर्शी बनाउन तथा न्यायाधीशहरूको क्षमता मूल्यांकनका लागि यस्तो विवरण सार्वजनिक गर्दै आएको जनाएको थियो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
