गृह मन्त्रालय संवेदनशील मन्त्रालय हो, हरेक कुरा भन्न मिल्दैन:गृहमन्त्री अर्याल

काठमाडौँ । गृहमन्त्री ओमप्रकाश अर्यालले गृह मन्त्रालय अत्यन्त संवेदनशील क्षेत्र भएकाले कतिपय विषय सार्वजनिक गर्न नसकिने बताएका छन्। उनले मन्त्रालयले के गर्दैछ वा के गरिसक्यो भन्ने कुरा हरेक समयमा खुलासा गर्न सम्भव नहुने बताए।

फेसबुकमार्फत आफ्नो धारणा सार्वजनिक गर्दै गृहमन्त्री अर्यालले लेखेका छन्, “गृह मन्त्रालय हरेक हिसाबले संवेदनशील मन्त्रालय हो। कतिपय विषयमा के गर्दैछौं भन्न मिल्दैन, के गर्‍यौं भन्न पनि मिल्दैन। हामीसँग शुद्ध चित्तले कर्म गरिरहने बाहेक अरू विकल्प छैन।”

उनका अनुसार सरकार सुशासनको मार्गमा अघि बढ्दै देशलाई निर्वाचनमार्फत स्थायित्व र निकासतर्फ लैजान प्रतिबद्ध छ। उनले लेखेका छन्, “कार्यकालको अन्त्यमा जनतालाई धैर्यका लागि धन्यवाद दिनेछौं। पाइलैपिच्छे सुशासनको बाटो हिँड्दै सरकारलाई लक्ष्यमा पुर्‍याउने हाम्रो उद्देश्य हो।”

यो अभिव्यक्ति जनजागरण अगुवा सुदन गुरुङले गृहमन्त्री अर्यालको कार्यशैलीप्रति उठाएका प्रश्नको बीचमा आएको हो।