आन्दोलन विचमा विद्यालयको अभिभावकलाई एसएमएस बच्चा लिन आउन आग्रह

काठमाडौं । राजधानीको नयाँ बानेश्वर क्षेत्रमा जारी जेनजी आन्दोलनका कारण सामान्य जनजीवन मात्र नभई शैक्षिक सत्र पनि प्रभावित भएको छ। प्रदर्शनका क्रममा सुरक्षात्मक कारण देखाउँदै विभिन्न विद्यालयहरूले अभिभावकलाई आफ्ना बालबालिका तत्काल लिन आग्रह गरेका छन्।

विद्यालयहरूले अभिभावकलाई पठाएको एसएमएसमा भनिएको छ, “आ–आफ्ना नानीबाबुहरूलाई परिस्थिति अनुसार कुनै पनि समयमा लिन आउनु हुन अनुरोध गरिन्छ।” विद्यालय बसमार्फत आवतजावत गर्ने विद्यार्थीका लागि व्यवस्थापन चुनौतीपूर्ण बनेकाले आपत्कालीन अवस्थामा अभिभावकले आफ्नै पहलमा पनि व्यवस्थापन गर्नुपर्ने उल्लेख गरिएको छ।

एक अभिभावकले आजको विद्यमान परिस्थितिलाई मध्यनजर राख्दै विद्यालयले सचेतनात्मक सन्देश पठाएको जानकारी दिएका छन्।

प्रदर्शनका कारण नयाँ बानेश्वर क्षेत्रमा तनाव बढेको र आवागमनमा कठिनाइ सिर्जना भएको छ। अभिभावकहरू बालबालिकाको सुरक्षालाई लिएर चिन्तित देखिएका छन् भने विद्यालयहरूले परिस्थिति सामान्य नभएसम्म पढाइलाई प्रभावित हुनसक्ने संकेत गरेका छन्।