विद्युत् प्राधिकरणको कारबाही तीव्र, ४९ करोडभन्दा बढी असुली बाँकी

चितवन । नेपाल विद्युत् प्राधिकरण वितरण केन्द्र भरतपुरले चालु आर्थिक वर्षमा लामो समयसम्म विद्युत् महसुल नतिर्ने २७७ ग्राहकलाई कालोसूचीमा समावेश गरेको जनाएको छ । केन्द्रका अनुसार ती ग्राहकबाट हालसम्म रु एक करोड चार लाख १७ हजार ३८१ बराबरको बक्यौता उठ्न बाँकी रहेको छ । बक्यौता असुलीलाई प्रभावकारी बनाउन कारबाही प्रक्रिया अगाडि बढाइएको सूचना अधिकारी नन्दराम विष्टले जानकारी दिएका छन् ।

केन्द्रले बक्यौता असुली अभियान अन्तर्गत यस आर्थिक वर्षमा एक हजार ८२६ ग्राहकको विद्युत् लाइन काटिसकेको छ । छ महिनासम्म महसुल नतिर्ने ग्राहकको लाइन काट्ने नीति अनुरूप यस्तो कदम चालिएको जनाइएको छ । नियमित भुक्तानी नगर्ने ग्राहकप्रति कडाइ गर्दै बक्यौता संकलनलाई तीव्र बनाइएको केन्द्रको भनाइ छ ।

हाल वितरण केन्द्र अन्तर्गत ७४ हजार ८७६ ग्राहक रहेकोमा कुल रु ४९ करोड चार लाख १० हजार ४३७ बराबरको बक्यौता उठ्न बाँकी रहेको तथ्याङ्कले देखाएको छ । बक्यौता असुलीका लागि सूचना प्रवाह, चेतावनी, लाइन विच्छेदलगायतका उपाय अपनाइएको र कर्मचारीहरू नियमित रूपमा परिचालन गरिएको केन्द्रले जनाएको छ ।