नेपालगञ्जमा कर्फ्युको अवज्ञा गर्दै प्रदर्शन

काठमाडौँ  , १६ असोज |  मंगलबार बाँकेको नेपालगञ्जमा कर्फ्युको आदेश जारी भएपनि स्थानीयले प्रदर्शन गरेका छन् ।कर्फ्युको अवज्ञा गर्दै बिपीचोकमा भेला भएका हिन्दूवादीहरूले टायर बालेर प्रदर्शन गरेपछि प्रहरीले हवाई फायर गरेको छ । प्रदर्शन रोक्न हवाई फायर भएपछि सार्वसाधारण तितरबितर भएका छन्।

बाँकेको नेपालगञ्जमा स्थानीय प्रशासनले कर्फ्यु लगाएको छ । सामाजिक र धार्मिक सद्भाव भड्किने संकेत देखिएपछि नेपालगञ्ज उपमहानगरपालिका क्षेत्रमा कर्फ्यु जारी गरिएको हो ।

हिन्दुहरुको समूह आज नेपालगञ्जमा भेला भएर प्रदर्शनमा उत्रिएको छ । त्यसमा झडप हुन सक्ने र सदभाव बिग्रिने संकेत देखिएपछि कर्फ्यु जारी गरिएको हो । सम्भावित तनाबलाई मध्यनजर गर्दै नेपालगञ्जमा आज बिहान सद्भाव र्यालीसमेत निकालिएको थियो ।

जिल्ला प्रशासन कार्यालय बाँकेले सोमबार मात्र जरुरी सूचना जारी गरी धार्मिक आस्थामा आँच पुर्याउने, धार्मिक विद्वेष फैलाउने जस्ता गतिविधि नगर्न भनेको थियो । यदि त्यसो गरेमा स्थानीय प्रशासन ऐन २०२८ तथा प्रचलित कानुन बमोजिम कडा कारबाही गर्ने चेतावनी दिएको थियो । सुरक्षाका लागि अहिले नेपालगञ्जमा व्यापक मात्रामा सशस्त्र प्रहरी, नेपाल प्रहरी परिचालन गरिएको छ ।