अध्यादेश जारीपछि पहिलो परिषद् बैठक, प्रधानन्यायाधीश नियुक्तिमा चासो

काठमाडौँ। बालेन्द्र शाह ले आज साँझ ५ बजेका लागि संवैधानिक परिषद्को बैठक आह्वान गरेका छन्। संवैधानिक परिषद्सम्बन्धी नयाँ अध्यादेश जारी भएपछि रिक्त रहेका विभिन्न संवैधानिक पद तथा विशेषगरी प्रधानन्यायाधीश नियुक्ति प्रक्रियालाई अघि बढाउन बैठक बोलाइएको जनाइएको छ।

प्रधानमन्त्रीको सचिवालयका अनुसार सर्वोच्च अदालतमा प्रधानन्यायाधीश पद रिक्त रहेकाले न्यायपालिकाको नेतृत्व चयनलाई प्राथमिकता दिँदै परिषद् बैठक आह्वान गरिएको हो। हाल सर्वोच्च अदालतको नेतृत्व कामु प्रधानन्यायाधीश सपना प्रधान मल्लले सम्हाल्दै आएकी छन्। प्रधानमन्त्रीका प्रेस विज्ञ दीपा दाहालले संवैधानिक दायित्वअनुसार न्यायपालिकाको नेतृत्व चयन प्रक्रिया अगाडि बढाउन बैठक महत्वपूर्ण हुने बताएकी छन्।

यसअघि राष्ट्रपति रामचन्द्र पौडेल ले गत मंगलबार संवैधानिक परिषद्सम्बन्धी अध्यादेश जारी गरेका थिए। नयाँ व्यवस्थाअनुसार परिषद्को बैठक सञ्चालनका लागि अब ६ सदस्यीय परिषद्मध्ये चार जना उपस्थित भए गणपूरक संख्या पुग्नेछ। साथै, कुनै पनि निर्णयका लागि कम्तीमा तीन सदस्यको बहुमत पर्याप्त हुने कानुनी व्यवस्था गरिएको छ।

संवैधानिक परिषद्मा प्रधानमन्त्री अध्यक्ष रहने व्यवस्था छ भने प्रतिनिधिसभाका सभामुख, राष्ट्रिय सभाका अध्यक्ष, उपसभामुख, प्रमुख प्रतिपक्ष दलका नेता तथा प्रधानन्यायाधीश सदस्य रहने कानुनी प्रावधान रहेको छ।